Os donos do Celler elixen este produto para a súa cesta mensual do programa Gastronomía Sostible
16 abr 2021 . Actualizado ás 09:32 h.O Celler de Can Roca elabora todos os meses unha selección dos mellores produtos de tempada a través do programa Gastronomía Sostible. A idea desta iniciativa é a de promocionar os ingredientes de proximidade e dar visibilidade aos pequenos produtores sostibles de toda España confeccionando unha serie de cestas que son enviadas mensualmente a todos os participantes neste programa. Nesta ocasión, entre a lista de produtos que recibirán os subscritores deste programa figura un queixo galego, o Galmesano. Xunto coas alcachofas de Tudela, protagoniza un prato elaborado polos populares propietarios do Celler de Can Roca.
Costela de porco Lekunberri, pemento de Jarandilla de la Vera, tirabeques do baixo Llobregat, piñones de Valladolid , mel dos parques naturais das comarcas de Xirona e un viño ecolóxico da Rioxa compoñen o resto da cesta que deseñaron os irmáns Roca para o envío do programa Gastronomía Sostible deste mes. Inclúen, ademais, unha serie de receitas para preparar estes produtos, co fin de dar a coñecer o traballo que fan os pequenos produtores de todo o país. Neste caso, unha das receitas é unha velouté de alcachofa con flor da propia alcachofa, acompañada dunha crema de Galmesano. Este queixo que se elabora na Coruña coa técnica tradicional da pasta prensada cocida e de longa maduración consegue así un oco destacado na despensa dos Roca. Con el, elaboran unha crema que é o acompañamento perfecto para as alcachofas. Desde que chegou aos mercados, Galmesano obtivo numerosos recoñecementos e premios.