Agricultores e gandeiros denuncian danos cuantiosos nos maizales
29 sep 2020 . Actualizado ás 09:59 h.Afectados as desfeitas que causan os xabarís nas colleitas, en especial nos maizales, pero tamén en prados, iniciaron os trámites para emprender medidas legais contra os tecores (territorios cinegéticamente ordenados) e a Xunta. «Intentamos levar adiante demandas xudiciais contra os responsables dos danos, os cazadores no caso de fincas situadas nos tecores, e a Administración, nas zonas libres», explica o naronés José Antonio Muíño, presidente da Asociación Prexudicados pola Fauna Salvaxe de (Aperfasa) de Galicia.
As denuncias son individuais, por parte de cada damnificado. «Se a vía do diálogo falla, hai que ir pola lei, penso que non é a mellor opción, pero non vemos outra», apunta Eliseo Cebreiro, gandeiro de San Sadurniño. Como colectivo, Aperfasa enviou un escrito á Consellería de medio Ambiente «para saber que se está facendo coas fichas de danos que fan os axentes medio ambientais cada vez que se denuncian estragos causados polos xabarís», indica Muíño. «Non sabemos se se informa aos tecores nin se se está usando esa información para buscar actuacións que solucionen o problema. Sería bo para toda a sociedade, e todos sabemos que a solución pasa por controlar as poboacións, volver á situación de hai 15 ou 20 anos, cando había danos, pero eran asumibles», abunda o responsable desta asociación.
Os estragos acadan tal magnitude que algúns gandeiros ou agricultores de Ferrolterra exponse deixar de plantar millo. É o caso de César Beceiro, granxeiro de Moeche que perdeu unha parcela de nove hectáreas, xa no momento de seméntaa, e unha ampla superficie de maizal, xusto antes de empezar a ensilar.
Desde Aperfasa tamén solicitaron unha reunión coa directora xeral de Patrimonio Natural, Belén do Campo, para abordar os problemas orixinados polos xabarís nas colleitas. E pretenden convocar un encontro entre representantes dos concellos máis prexudicados por este fenómeno, dos tecores destes municipios e do sector agrogandeiro, «para que cada parte expoña como ve a situación».
A pandemia do covid-19 condiciona a reunión, pero Muíño entende que «seguindo todas as medidas de seguridade, distancias, etcétera, non ten por que haber problema en facer unha xuntanza de todos».
Eliseo Cebreiro lamenta que «se deixara chegar á situación na que estamos». Das ao redor de cen hectáreas que planta de millo, entre Narón e Valdoviño, seis xa as tivo que resembrar na primavera. «Hai fincas nas que che estraga o 20 % e noutras, o 50; ao pé da estrada non te dás conta, pero cando te metes polo medio do millo xa o ves. E pódese ver que o pastor eléctrico non é a solución que nos din... Igual que tampouco o é o caramelo que nos dá a Administración. O que queremos é vivir do noso traballo», remarca.