Os proxectos máis ambiciosos, os que rozan as dez hectáreas, son de empresas de Rías Baixas
08 feb 2020 . Actualizado ás 05:00 h.Todos os anos, a Consellería do Medio Rural convoca axudas para que os viticultores e adegas galegas poidan reestruturar e reconverter as súas viñas. Subvencións que permiten renovar a vide, cambiar a variedade de uva ou realizar novas plantacións, se se conta coas pertinentes autorizacións. A Xunta acaba de facer pública a resolución da convocatoria deste ano. Recibíronse 164 solicitudes, das que 122 foron aprobadas. En total, repartirase máis de 1,5 millóns de euros, o que permitirá realizar un investimento superior aos 2,6 millóns.
Aumentar a competitividade dos produtores vitivinícolas, mellorar os seus sistemas de produción e reducir a pegada ambiental do sector son os tres obxectivos que perseguen estas subvencións. E é que con elas se fomenta a adaptación das variedades de uva para axustarse ás preferencias dos consumidores ou para preservar as viníferas autóctonas galegas, que teñen unha calidade diferenciada e ofrecen vantaxes nos mercados, sosteñen na consellería. Tamén se busca o aumento da profesionalización dos viticultores galegos, á vez que se potencia o cambio xeracional, facilitando o acceso dos máis novos ás explotacións.
En total, renovaranse 143 hectáreas de vide en varias denominacións As axudas están pensadas para persoas con viñedo destinado á produción de uva para vinificación e o pasado ano rebaixouse a superficie máxima que se pode acoller a elas, que é de 10 hectáreas por viticultor. Aplícanse, sobre todo, en superficies onde levan a cabo operacións de reimplantación de viñas, reconversión varietal ou mellora das técnicas de xestión do viñedo.
A maioría das solicitudes aprobadas son para plantacións cunha superficie inferior a unha hectárea, mostra do minifundio que existe tamén no sector do viño galego. De boto, 90 das peticións presentadas polas adegas galegas son para superficies con esta extensión. Outras vinte permitirán reestruturar viñedos de entre unha e dúas hectáreas de superficie, mentres que só seis son para viñedos de entre catro e cinco hectáreas. Hai, ademais, unha única solicitude para unha parcela de oito hectáreas, situada na denominación de orixe Monterrei.
Pero os catro proxectos nos que prevén facer unha maior reestruturación sitúanse na denominación de orixe Rías Baixas. Alí hai previstas tres plantacións de máis de nove hectáreas e unha máis que chega ata as dez. Unha sitúase na subzona do Ulla, outra na do Salnés e as dous restantes están capitaneadas por adegas do Rosal. Estas catro investimentos superan os cen mel euros cada unha, segundo os datos publicados no Diario Oficial de Galicia.
Solicitudes denegadas
Na orde de Medio Rural tamén se explican que ata 42 solicitudes doutras tantas adegas foron denegadas. A maioría delas, ata unha ducia, foi porque os seus promotores desistiron de sacala adiante. Tamén houbo numerosos casos nos que non contestaron os requirimentos da Administración autonómica. Os restantes rexeitamentos baséanse en que non cumprían os requirimentos para ser persoas beneficiarias destas axudas.