A área sanitaria de Santiago e Barbanza inicia decembro con 473 casos de covid, nove veces máis que hai un mes
SOCIEDADE
Un home falecido no Clínico onte é o primeiro óbito en 48 días pola nova enfermidade
01 dic 2021 . Actualizado ás 11:48 h.A área sanitaria de Santiago e Barbanzaa comeza decembro con 473 persoas a tratamento de covid-19, segundo os datos que facilita hoxe o Sergas. Son 29 máis que os notificados onte. Nas últimas 24 horas descubríronse 49 novos casos (a diferenza débese a que se recuperaron 20 nese mesmo período), tras realizar máis de 1.300 probas diagnósticas (a maioría, 759, PCR).
O incremento dos contagios é constante desde o día 9 de novembro e a pandemia leva 23 días continuados de crecemento. O dato que se coñece hoxe supón multiplicar por 9 os 53 casos activos o 1 de novembro. Desde o 15 de setembro non había tantas persoas infectadas desta nova enfermidade nos 46 municipios que forman a área de saúde compostelá.
Con todo, agora os casos son menos graves. Están ingresadas 9 persoas contaxiadas, todas no CHUS, onde catro delas reciben coidados críticos. As outras 464 afectadas, máis leves ou asintomáticas, están a seguimento desde os seus domicilios.
Onte á noite o Sergas notificou a morte dun home de 86 anos, que estaba internado no Clínico, por covid-19. É o primeiro óbito por covid recoñecido en 48 días na área sanitaria, pois en anterior se notificou o 14 de outubro.
Novos contagios: 122 en Santiago
O incremento dos casos débese a que se detectan máis contagios novos. No municipio de Santiago diagnosticáronse 122 casos nos últimos 14 días, e 80 deles a última semana. Tras a capital, na súa zona metropolitana os municipios onde se detectaron máis casos novos as dúas últimas semanas son Ames (21), Teo (15) e Ordes e Santa Comba (11 en cada).
En Frades, Melide, Padrón, Toques, Touro, Trazo e Val do Dubra non se declaran novos casos nos últimos días. A mellor situación é a de Toques, onde se manteñen libres de novas persoas infectadas desde o 7 de novembro.