Case 50 positivos derivados do brote pola voda celebrada en Lugo a fin de semana pasada
SOCIEDADE
O Sergas está realizando as probas de detección do coronavirus a todos os invitados que acudiron ao evento
09 jul 2021 . Actualizado ás 13:15 h.O Sergas confirmou que hai 45 positivos relacionados coa celebración dunha voda a pasada fin de semana na cidade de Lugo, aínda que avisa de que poderían aparecer máis casos nas próximas horas. Os contagios afectan a persoas residentes en Meira , A Pastoriza e Castro de Rei, aínda que tamén hai contaxiados noutros municipios de Galicia e mesmo de España, segundo fontes oficiais.
Tras a aparición dos primeiros casos de covid-19 , o Sergas accedeu á listaxe de asistentes, que xa están en corentena e algúns teñen síntomas tras ter dado positivo. Polo momento, está a investigarse o foco e localizando aos contactos dos asistentes para evitar así que se produzan cadeas de transmisión.
Focos tras a primeira fin de semana de festa
O xerente da área Sanitaria de Lugo, A Mariña e Monforte de Lemos confirmou que hai varios focos de covid-19 activos na cidade e vinculados ao lecer nocturno. Actualmente, os sanitarios tratan de estudar todos os contactos das persoas que deron positivo tras a primeira fin de semana de festa en Galicia. Aínda que Ares admite que este incremento non fixo que suba a presión asistencial nos hospitais, avisa de que a incidencia é alarmante e lembra que os mozos contaxian aos seus familiares, provocan baixas laborais e poñen en perigo ás persoas maiores coas que conviven, xa que aínda que estean vacinadas poden contraer o covid-19.
A situación na provincia é crítica e os contagios levan días subindo escalonadamente, aínda que, tal e como precisa Ares, concéntranse na poboación que ten menos de 30 anos. Ademais, hai positivos diseminados por numerosos concellos da provincia, sempre relacionados con pacientes novos.