O sector do lecer nocturno alerta da proliferación en toda Galicia de eventos ilegais
SOCIEDADE
Aseguran que hai locais que abren fóra de horario e organizan festas e concertos sen cumprir as normas. Temen que o «desenfreo» empeore a situación epidemiolóxica e remate prexudicándolles
19 jun 2021 . Actualizado ás 05:00 h.«Sabemos que a xente quere gozar. É inevitable, non podemos frear esta euforia e estas ganas despois de 15 meses reprimidos socialmente, pero isto estase desmadrando e para nós é moi grave porque supón o peche dos nosos negocios e non nos permite traballar». Son as desesperadas palabras de Carlos Rodríguez, presidente de Apemer e empresario do lecer nocturno. Como el, moitos outros comproban impotentes como algúns establecementos e particulares en Galicia sáltanse as normas e asumen as tarefas que corresponderían ao sector do lecer nocturno, pondo o perigo a evolución epidemiolóxica, vital para recuperar a normalidade e os seus negocios.
«Hai moitas actividades que están incumprindo as prohibicións, e non só é polo que poidan chegar a provocar, é que estamos ás portas de que a Xunta nos permita reabrir e vemos que cada vez hai máis aumento de botellóns, de festas ilegais...», explica, e detalla que cada vez ven máis restaurantes e outros locais anunciados en redes sociais que organizan concertos e actividades musicais con picadiscos. Chégannos moitas cartas alertando de locais de lecer nocturno que están incumprindo a lei porque están a abrir, cando a realidade é que non son locais de lecer nocturno, senón bares ou restaurantes que exercen a actividade que teriamos que estar a desenvolver nós e que nestes momentos a teñen prohibida».
Para o presidente de Apemer, estas actividades «están degradando a nosa imaxe, facendo algo que nós levamos meses sen poder facer e co risco do incremento de casos e contagios, que se o hai Sanidade a quen castiga é á hostalería e ao lecer nocturno». Carlos Rodríguez afirma que na maioría dos casos intentan pórse en contacto cos locais e advertirlles da ilegalidade que están a cometer, «pero hai sitios onde hai claras reincidencias, como Vigo, onde hai polo menos un local que se precintou tres veces e outros en dúas ocasións». «Estamos a tratar de evitar enfrontamentos legais con outros hostaleiros, pero non descartamos presentarnos como asociación para tomar accións legais se fose necesario». Os representantes de Apemer tiveron unha reunión co xefe de policía na que lle agradecemos que estean aí, porque ao final nós estamos a desexar abrir, aínda que xa sabemos que moitos non poderemos facelo nas condicións que nos van impor».
Os empresarios do lecer nocturno están preocupados pola situación epidemiolóxica, porque xa viviron antes situacións de mellora que acabaron mal. «Hai aínda moita xente nova sen vacinar, e eles son os que máis socializan. Grazas a deus non morren nin ocupan camas uci, pero se que se contaxian , e os contagios son números que farán que se hai calquera repunte a primeira medida sexa volver pechar o sector».
Desde Apemer apelan de novo ao «sentidiño», á prudencia e animan á xente a «aguantar un pouco para que todos poidamos REVISAR gozar en condicións». Pero están a ver que a xente está moi cansa. «Antes dabámoslle prioridade á vida das persoas maiores, é totalmente coherente —reflexiona Rodríguez—, pero agora hai moitos clientes, e mesmo amigos, que xa pensan ‘veña que xa estamos aí ‘ e teñen actitudes de irresponsabilidade. É un engano, porque a xente vacinada pode contaxiar e iso é o que máis medo nos dá, que no canto de ir para adiante e avanzar pois que en agosto ou setembro esteamos a dar pasos para atrás».
