Os ceos nubrados e as choivas serán os protagonistas duns días máis propios de abril que dun xuño que roza o inicio do verán
18 jun 2021 . Actualizado ás 19:47 h.Choivas e ceos nubrados. Esas dúas serán as notas da fin de semana. Aínda que o verán estea ás portas, a situación meteorolóxica de Galicia para os próximos días é máis propia do mes de abril que deste xuño que xa avanza na súa segunda parte. Choverá mañá nunha boa parte da comunidade. Choverá o domingo en practicamente toda. E o luns só haberá unha tregua na parte final do día.
Toca xa que logo paraugas e chubasqueros, desviar as comidas programadas ao aire libre para outro momento e resignarse. Nada novo. Levan varios días os galegos nesa situación. E mañá sábado o panorama será similar ao de hoxe. Tal e como indica Meteogalicia mantense o aire frío nas capas altas da atmosfera e polo tanto a inestabilidade. O día arrincará cos ceos parcialmente cubertos e co avance da xornada rexistraranse chuvascos, máis probables no interior da comunidade. Pola noite a chegada dunha fronte polo oeste deixará choivas máis xeneralizadas. As temperaturas mínimas non terán cambios, mentres que as máximas sufrirán un lixeiro descenso. Só Ourense acadará os 20 graos. O resto de localidades quedará por baixo.
O vento soprará frouxo en xeral, de compoñente norte durante o día. Cambiará a compoñente oeste pola tarde e a sur pola noite, cando aumentará en intensidade, sendo forte no litoral.
Domingo máis chuvioso
Na madrugada do sábado ao domingo chega unha nova fronte que atravesará Galicia deixando ceos cubertos e choivas. Así o domingo amencerá con chuvascos. Serán menos frecuentes canto máis ao leste da comunidade. As temperaturas non experimentarán cambios significativos. Os ventos soprarán do suroeste, moderados en xeral, con intervalos fortes no litoral noroeste.
E a semana non empezará mellor. O luns apenas haberá un moderado ascenso das temperaturas, pero seguirá a auga. O ceo estará parcialmente cuberto e as precipitacións intermitentes repartiranse ao longo do día e por toda a xeografía galega. O vento soprará moderado do noroeste.