O conselleiro anunciou que o certificado de inmunización de Galicia xa está dispoñible e que se valora continuar a campaña en grandes recintos e deixar os centros de saúde para os dependentes
18 abr 2021 . Actualizado ás 00:34 h.A Consellería de Sanidade quere acabar este mes de administrar todas as segundas doses da vacina anticovid aos galegos que teñen 80 anos ou máis. «Queremos rematala en abril ou nos primeiros días de maio», dixo onte o conselleiro de Sanidade, Julio García Comesaña. Máis da metade xa teñen as dúas doses. A excepción a ese obxectivo son as persoas que superan os 80 e que son grandes dependentes. Quedaron relegados para o final e agora os equipos de enfermería están percorrendo os domicilios, un proceso moito máis lento pola dispersión da poboación. Aínda quedan centos que non recibiron nin sequera a primeira dose do soro e terán que agardar outras tres semanas pola segunda.
En todo caso, a gran maioría dos cidadáns de máis de 80 quedarán blindados a partir deste mes. Calcúlase que a protección máxima que pode ofrecer a vacina contra o coronavirus comeza unha semana despois de recibir a segunda dose, porque é cando o organismo tivo tempo suficiente a xerar anticorpos.
Galicia afronta un escenario distinto a partir de agora no que se refire á vacinación. Desde este mes a chegada de dose creceu e chegan 100.000 de Pfizer por semana. Agárdase que en maio aumente máis. A Consellería de Sanidade planificaba que desde xuño chegarían unhas 150.000 viarios por semana. A paralización da vacinación con Janssen antes de comezar, así como os cambios e a falta de subministración de AstraZeneca , poderían dar ao traste con eses plans, pero Sanidade confía agora en recibir unhas 200.000 doses por semana grazas ao incremento prometido por Pfizer BioNTech á Unión Europea. Por iso, a consellería planea manter abertos os centros de vacinación masiva, onde se poñen miles de doses por día.
A aposta inicial era vacinar nos centros de saúde. Pero os centros externos como a Cidade da Cultura ou varios recintos feirais permiten concentrar nun só punto todas as doses, que en casos como Pfizer son de difícil conservación, e tamén o persoal de apoio. O conselleiro apuntou onte que a súa opción é reservar os centros de saúde para as persoas dependentes, ás que lles custa máis desprazarse a un destes puntos de vacinación masiva. En todo caso, a decisión non está pechada aínda.
Comesaña visitou onte pola mañá o Ifevi de Vigo, que rexistraba unha asistencia menor que a doutros días, nunha fin de semana no que un total de 45.000 galegos están chamados a vacinarse.
Certificado vacunal
Galicia xa implantou o seu propio certificado de vacinación. Desde o xoves está accesible, dixo o conselleiro, a través da plataforma E-Saúde. Pódese consultar e tamén descargar. O documento confirma que foi vacinado contra o covid-19. «Nos vindeiros días incorporaremos outra información, como as probas microbiolóxicas e a súa data de realización, e se alguén ten superado o covid», explicou o conselleiro.
Europa pactou crear un documento similar en todos os estados, o certificado verde dixital de vacinación, para que calquera cidadán poida acreditar que está inmunizado. Cando saia adiante o europeo, asegurou Comesaña, o certificado galego adaptarase tecnicamente para cumprir os mesmos requisitos.
