Desde o día 4 superaron o covid 4.036 persoas na área sanitaria de Santiago e contaxiáronse 1.361

Na área sanitaria de Santiago tratábanse ás 18.00 horas de onte 694 persoas de covid-19, segundo os últimos datos, dos que informa o Sergas esta mañá. Son 48 menos que os comunicados onte. Das cifras conclúese que desde o 4 de febreiro superaron esta enfermidade 4.036 persoas e contaxiáronse 1.361 nos 46 municipios da área sanitaria. Son 22 días continuadas nos que houbo máis persoas curadas que infectadas desta nova enfermidade. Así, desde o inicio da pandemia, en marzo do ano pasado, recuperáronse ata agora 16.911 persoas (eran 12.875 o día 4 deste mes) e realizáronse 17.924 tratamentos (16.563 o día 4) de covid.

As persoas máis graves, ingresadas en hospitais, son agora 79 (acadáronse as 200, segundo informou o Sergas o primeiro día deste mes). Permanecen 17 en unidades de coidados críticos do Clínico, unha máis que onte; e descenden ata 62 (8 menos que as indicadas onte) as internadas noutras unidades de hospitalización. Dous destas últimas áchanse en HM Rosaleda e 60 máis no Clínico.

 Descenden os positivos

Os novos casos detectados os últimos 14 días por probas diagnósticos baixan na área metropolitana de Santiago . Na capital sitúanse en 110, a cifra máis baixa desde o 13 de decembro. En 17 dos 25 municipios hai 10 ou menos acumulados nas últimas dúas semanas. Só cinco municipios permanecen en situación de risco máximo de transmisión do covid, pois os casos acumulados equivalen a 250 ou máis por 100.000 habitantes, que é o indicador dese risco.

 Hai ata cinco situacións diferentes. A mellor é a de Santiso , con ningún caso identificado os últimos 14 días. Séguenlle Santa Comba, Negreira e Trazo, con entre 1 e 9 casos (ao baixar de 10 o Sergas non concreto) e unha incidencia acumulada (IA) equivalente a entre 25 e 50 casos por 100.000 habitantes.

 Cunha IA entre 50 e 150 áchanse Santiago, Ames (39 casos confirmados os últimos 14 días), Brión (13), Padrón (12), e A Baña, Melide, O Pino, Touro e Val do Dubra, estes cinco concellos con entre 1 e 9 casos. E cunha IA entre 150 e 250 están Teo (40 novos casos identificados os últimos 14 días), Ordes (26), Oroso (14), Vedra (10) e Boqueixón, Dodro, e Rois, con entre 1 e 9.

 Finalmente, están en situación de risco extremo de transmisión do coronavirus en Arzúa (21 novos casos identificados os últimos 14 días) e en Boimorto, Frades, Toques e Tordoia (entre 1 e 9 casos en todos eles), pois a cifra equivale a 250 ou máis por cada 100.000 habitantes.

---

---

---