O Aplidin, o antiviral de PharmaMar, é cen veces máis potente que o tratamento que se está usando para o covid-19

O fármaco contra o covid-19 da biotecnológica galega PharmaMar (o Aplidin) acaba de recibir unha importante lombeirada: un equipo de investigadores internacionais, liderados polo virólogo español Adolfo García-Xastre, do Hospital Monte Sinaí de Nova York, publicou na prestixiosa revista Science os primeiros resultados dun estudo sobre a plitidepsina que demostran que este fármaco, concibido inicialmente para tratar o cancro, é cen veces máis potente que o remdesivir, actualmente o único antiviral aprobado para tratar a enfermidade que provoca o SARS-CoV-2. 

«Este traballo confirma tanto a potente actividade como o alto índice terapéutico da plitidepsina que, polo seu especial mecanismo de acción, inhibe este coronavirus independentemente de cal sexa a súa mutación na súa proteína “S” (cepas británica, surafricana, brasileira ou as novas variantes que saíron recentemente en Dinamarca)», celebra o presidente do grupo, José María Fernández Sousa. A farmacéutica traballa xa con axencias do medicamento para empezar o ensaio de fase 3, que se vai desenvolver en varios países. Tendo en conta os tempos que requiren estes estudos e o que tardan os reguladores en dar a súa aprobación, o fármaco podería estar listo a mediados deste ano.

As conclusións deste grupo de científicos corroboran o que PharmaMar xa demostrara nos seus últimos ensaios con pacientes, que o medicamento ten potentes efectos antivirais. Desde esta compaña lembran que é importante ter claro que o virus veu para quedar, que as vacinas non o farán desaparecer. Isto esixe obrigatoriamente un tratamento que funcione ben e que sexa capaz de actuar contra calquera tipo de mutación. E precisamente é o que fai a plitidepsina (aplidina): non ataca a unha proteína do virus, senón que bloquear a molécula diana que está dentro das nosas células (eEF1A), que non muta, que non cambia, e que é necesaria para o SARS-CoV-2, sexa cal for a cepa.

«O virus, para replicarse, para facerse copias, necesita algo similar a unha máquina fotocopiadora, que sería esta proteína eEF1A -explican a biotecnológica-. Nós o que facemos é apagala. Xa que logo, o virus non pode facer copias e a infección paralízase». Iso si, para que sexa útil, o medicamento debe ser administrado no momento adecuado, na fase viral da enfermidade, cando o axente infeccioso aínda está no corpo facendo dano. Non se pode tardar moito. «É como cando hai un incendio nunha casa. Para salvala, os bombeiros teñen que chegar cando o lume está a empezar. As chamas teñen que ser atalladas ao principio». 

---

---

---