Tiña 85 anos e vivía na residencia de maiores do barrio do Morín
25 novs 2020 . Actualizado ás 20:55 h.Unha muller que se contaxiou de coronavirus morreu este mércores no hospital de Monforte. É o segundo falecemento que se produce neste centro sanitario desde que se detectou o brote de covid-19 de mediados de outubro.
Segundo a información facilitada pola Consellería de Sanidade, a falecida tiña 85 anos e era unha interna da residencia Domusvi de Monforte. Neste centro asistencial situado no barrio monfortino do Morín producíronse nas últimas semanas varios contagios, pero esta morte chega precisamente cando o brote está a remitir claramente e un día antes de que quede sen efecto o peche perimetral do municipio e o parón forzoso á hostalería que estaban en vigor desde o pasado día 9.
Dáse a circunstancia ademais de que a Xunta informaba este mércores pola mañá de que os últimos tres contaxiados na residencia Domusvi de Monforte foran dados de alta.
Nestes momentos, só quedan tres persoas contaxiadas con coronavirus e que están vinculadas a centros asistenciais de Monforte. Trátase dun interno e dous traballadores.
A anterior morte dun paciente con covid-19 no hospital de Monforte produciuse o pasado día 14. Foi unha muller e tamén tiña 85 anos.
Esta morte en Monforte é un das tres que se produciron en Galicia este mércores de persoas que foran diagnosticadas por coronavirus. Os outros dous son un home de 94 anos que morreu no hospital da Coruña e unha muller de 76 que estaba hospitalizada en Santiago.