O paciente, de 35 anos, foi tratado durante anos cunha combinación de antiretrovirales e nicotinamida. Desde hai máis dun ano non se detectou VIH nin no seu ADN nin no seu ARN
08 jul 2020 . Actualizado ás 09:24 h.Un paciente de sida en Sãou Paulo (Brasil) podería ser a primeira persoa en ter superado a enfermidade usando unicamente medicación e sen haber requirido agresivos transplantes de células nai, segundo os resultados dunha investigación presentados este martes e recolleitos por Efe.
Os resultados, sobre os que os propios investigadores pediron cautela e non sacar conclusións precipitadas, foron revelados no marco da 23 Conferencia Internacional da Sida que se celebra estes días de forma virtual por mor da pandemia de covid-19, pero que orixinalmente debía ter tido lugar en San Francisco.
Segundo un artigo publicado na revista Science, o paciente ten 35 anos e foi tratado durante anos cunha combinación de antiretrovirales e nicotinamida, un tratamento que foi interrompido en marzo do 2019, e, desde entón, o VIH (virus da inmunodeficiencia humana) segue sen detectarse tanto no seu ADN como no seu ARN.
A aparente ausencia de VIH no sangue do bautizado como «paciente de Sãou Paulo» quince meses despois de rematar o tratamento leva a pensar que este podería curarse, aínda que os propios responsables do estudo alertan de que non se dispón de resultados o suficientemente definitivos nin pasou o tempo necesario para así consideralo.
A investigación foi liderada polo doutor Ricardo Diaz da Universidade Federal de Sãou Paulo no Brasil.
Ata a data, só se ten constancia de dúas persoas que teñan sido curadas oficialmente de sida: Timothy Ray Brown, coñecido como «o paciente de Berlín» e Adam Castillejo, coñecido como «o paciente de Londres».
Ambos se someteron a operacións cirúrxicas moi complexas e agresivas como parte de senllos tratamentos contra o cancro que implicaron o transplante de medula ósea con células nai resistentes á infección por VIH, o que permitiu que os seus corpos creasen novos sistemas inmunitarios libres de sida.
Pese ao éxito destes dous casos, trátase de operacións moi complicadas, extremadamente caras e que implican perigos para o paciente, polo que o seu uso a gran escala resulta impracticable.