O período de apertura destes establecementos é ata o 30 de xuño. Tras o peche polo covid-19, a Xunta recomenda aos concellos que lles permitan manter a actividade ata finais de xullo
05 jun 2020 . Actualizado ás 18:06 h.Os furanchos xa poden abrir as súas portas para sacar adiante o viño acumulado nas súas cubas. Nunha reunión coa directora xeral de Administración Local da Xunta, Marta Fernández-Tapias, informouse á Federación Provincial de Furanchos de Pontevedra que poderían abrir desde o pasado 11 de maio se prestan servizo no exterior, e desde o 25 no caso de que a actividade se desenvolva no interior do local.
No entanto, son moitos os que agardaron e comezarán a atender ao público esta fin de semana. José Luis Videira, portavoz do colectivo, fará o propio hoxe no seu local de Chapela, no concello de Redondela , e tamén serán moitos os de Cangas que retomen a súa actividade ao contar xa coa autorización. En realidade o período de apertura dos furanchos é de tres meses desde o 1 de decembro ata o 30 de xuño. O que ocorre é que a crise do coronavirus fixo que cando se decretou o estado de alarma, o 14 de marzo, moitos destes locais non abriran nin un só día, o que impide que poidan aproveitar os tres meses. Por iso é polo que a Xunta teña recomendado aos concellos, que son os que teñen competencias sobre estas instalacións, que permitan ampliar ata finais de xullo esta apertura, para que os responsables dos furanchos teñan polo menos xuño e xullo para dar saída aos excedentes de viño.
O mes de xullo xa se habilitaba de forma excepcional cando por algún problema algún local non puidera aproveitar os tres meses. O colectivo, no entanto, quere ir máis aló e que se estenda esta apertura en agosto, xa que a pandemia fixo que queden con dous meses escasos para abrir. Cada concello ten o seu rexistro propio de furanchos e é quen debe garantir que se cumpren as normas. Aínda que son establecementos abertos ao público, teñen unha regulación propia polas súas singularidades.