As chamadas a os municipais por supostas infraccións do confinamento sucédense. Algunhas estanse investigando. Pero en Poio, Sanxenxo, Marín e Bueu non tiveron que tramitar denuncias
31 may 2020 . Actualizado ás 20:37 h.«Policía, veña a mirar se están aquí uns ourensáns». Ata tres chamadas con peticións similares recibiu este domingo, xornada de sol nas Rías Baixas, a Policía Local de Poio, tal e como confirmou o seu xefe, Antonio Duarte. En total, en toda a semana, foron unhas dez presentas as que chamaron para alertar de posibles infraccións do confinamento ou, o que é o mesmo, para dicir que neste municipio costeiro coáronse persoas doutras provincias, sobre todo de Ourense.
Realmente, esas chamadas correspóndense coa realidade e hai persoas que, talvez levadas polo bo tempo, están a saltarse o confinamento e desembarcando en Poio? A Policía Local sinala que, de momento, non tivo que denunciar a ninguén. Iso si, Antonio Duarte, o xefe policial, advirte: «Estamos vixiando e comprobando todas esas chamadas. Chamáronnos tanto de Raxó como de Chancelas dicindo que había aquí xente de Ourense. Pero finalmente nós non denunciamos a ninguén. Non é fácil porque a xente chama e non sabe identificar en que piso están os supostos infractores, e son edificios onde chamas aos timbres e non soe abrir ninguén porque están as vivendas vacías, son segundas residencias. Pero seguímolo mirando. Tamén hai que dicir que se deu algún caso no que chamaron porque había persoas de Ourense e, en realidad, eran veciños naturais de Ourense pero coa residencia en Vigo, co cal si que podían estar en Poio porque están dentro da provincia».
Que din desde o veciño municipio de Sanxenxo, punto neurálxico do turismo nas Rías Baixas? O Concello sanxenxino sinala que durante todo o estado de alarma están a producirse chamadas alertando da chegada de persoas doutros lugares, pero que case nunca se corresponden coa realidade. Tamén indica nin o sábado nin o domingo, pese ao tempo de praia, tramitouse unha soa denuncia por parte da Policía Local por infrinxir o confinamento. O Concello, que prepara xa a tempada turística de verán para reactivar o seu gran alicerce económico, insiste en que a situación está controlada e, aínda que é certo que hai ambiente no paseo ou a praia de Silgar, os forasteiros por agora son persoas do interior da provincia de Pontevedra que teñen segundas residencias en Sanxenxo. Desde o alto, o sábado había bastante máis ambiente que o domingo na capital sanxenxina, onde ao mediodía non era difícil coller sitio nas terrazas.
En Marín e Bueu, os outros dous municipios costeiros da ría de Pontevedra, tampouco se puxeron denuncias estes días pola chegada de persoas de fóra da provincia. No caso de Bueu, segundo explicou o xefe policial, si houbo alerta pola chegada dunha caravana con persoas que, supostamente, viñan de Ourense, pero finalmente comprobouse que era un vehículo que se vendeu a veciños da provincia. Xa que logo, todo estaba en regra.
A tenor do devandito desde os concellos e as policías locais, na ría de Pontevedra non se está detectando por agora o que, segundo o presidente da Xunta, Alberto Núñez Feijoo, está a ocorrer nalgún outro municipio galego. Cabe lembrar que este domingo, en rolda de prensa, lamentou ter a constancia desde algún concello galego «dunha notable presenza de persoas que veñen doutras comunidades», un tema preocupante, e causa da extensión da pandemia a finais de febreiro e principios de marzo.
