A Canalla fideliza clientes durante tres meses con tres opcións
30 may 2020 . Actualizado ás 05:00 h.Tras a anterior crise económica do 2008, os deseñadores da Canalla, firma viguesa creada polos irmáns Fran e Patricia Soto, arrastraron un bajón que lles levou, catro anos máis tarde, a pór en marcha un proxecto colaborativo que lles axudou a superar esa mala serie e financiar a montaxe da tenda online. «Naquel momento o proxecto era totalmente analóxico. Contactabamos por carta cos clientes para que sumasen a unha cota que ía desde 5 a 60 euros ao mes que abonaron durante case tres anos», lembra Fran. Coa nova crise orixinada polo parón obrigado debido ao coronavirus, A Canalla volveu a tirar desa fórmula, rebautizada agora como Rewind (Rebobina) que, como explica Fran baséase, sobre todo, na confianza o seu traballo. «Esta vez, obviamente, faise a través das redes sociais, e cubrindo un formulario para anotarse. Está a ser emocionante comprobar que hai moita xente que aposta por outra forma de consumir. En cinco días tiñamos xa 38 persoas dispostas a pagar unha cota que vai desde 25 a 200 euros ao mes durante tres meses e agora xa hai máis de 70», conta.
Co plan 1+1=2020, que así se chama, eles pensaban capear este período, pero foi máis que iso. «Non agardabamos semellante resposta, pensabamos que nos daría para pagar os gastos cotiáns, pero ao final temos un colchón económico que nos permite estar un pouco máis tranquilos», recoñece. O sistema de mecenado iniciárono en abril e pechárono en 15 días, pero volvémolo abrir porque había lista de espera e agora pecharémolo definitivamente o 31 de maio porque de todos os xeitos, a nosa capacidade é limitada», argumenta. O deseñador engade que están xa traballando con outros proxectos «e ata esta semana non abrimos a opción de recollida no noso estudo para pór todas as normas de seguridade sanitaria, coa sorte de que temos dobre porta e por unha accédese á zona onde está a roupa e sáese pola outra. Témolo todo moi organizado e recibimos con cita previa», afirma.
Existen tres opcións que se elixen a través dun link a un formulario de Google onde hai tres casas con dúas opcións cada unha. Na opción Colecciones páganse bonos de 25 ou de 50 euros durante tres meses, para levar unha ou varias pezas xa confeccionadas. Coa segunda opción Ao Rescate, a xente lévalles unha peza con valor emocional ou un valor de calidade e o prezo do bono pode ser ou de 30 ou de 60 euros. «Dependendo da cota dedicaremos á peza 12 ou 24 horas de traballo a 7,50 euros a hora, incluídos os materiais», aclara. A terceira liñas de traballo é A Medida, para conseguir unha ou varias pezas de deseño e patronaje, con cotas de 100 ou de 200 euros durante tres meses.
«Se non lles vale a peza adaptámoslla ou lle facemos unha máis axustada á súa talla, porque, claro, non puideron probalas. É o custo da confianza, xa que moitos son clientes que nos apoian desde hai moito tempo», razoa.
«Temos xente de Edimburgo, Grenoble, Madrid, Barcelona, etc. Fixemos un cubrecamas confeccionado con tecidos recuperados que se vai para Oviedo, uns coxíns para Madrid, estamos facendo unhas bolsas de praia para unha clienta de Vigo... Non paramos. Iso axuda a que non che de o bajón e este parón, ademais obrígache a reflexionar sobre como vivimos e que as agresións ao planeta e o consumo excesivo ten consecuencias», opina.
Soto indica que desenvolvendo a iniciativa «pensando que a roupa non é algo de primeira necesidade, o que pasa é o que sabemos facer», xustifica engadindo que por agora descartan deseñar máscaras. «Nós mesmos estamos a usar as de farmacia, que son as que nos fan sentirnos máis seguros tendo contacto a diario coa nosa nai, que ten 80 anos e non che podes arriscar», razoa.
O deseñador argumenta e lembra que a súa filosofía vai co slow fashion respectando as condicións de traballo. «Non entramos dentro dos ciclos de consumo, roupa de tempada, rebaixas e superofertas. É outra cousa. Propuxemos á xente que apoie a nosa forma de entender a vida», resume. «E fainos moita ilusión saber que nos momentos difíciles entendémonos e brotan as accións solidarias».