Os expertos do comité galego non ven utilidade clínica aos test recibidos
SOCIEDADE
Non distinguen o tipo de anticorpo, polo que non se sabe se o paciente está curado ou se aínda é contaxioso
08 abr 2020 . Actualizado ás 14:40 h.Os 57.000 test que recibiu a Xunta para diagnosticar en residencias e centros sanitarios non son a panacea. Ata o punto de que os profesionais que forman parte do comité galego de xestión da crise recomendan non usalos pola súa nula utilidade clínica. O motivo: non distinguen se un paciente ten o virus, está pasando a enfermidade e polo tanto contaxia ou se simplemente ten anticorpos porque superou o coronavirus e é inmune.
Os test detectan dous anticorpos: os IGM e os IGG. Os primeiros aparecen ao cuarto ou quinto día, cando o corpo empeza a defenderse do virus. Os segundos fano máis tarde e quedan. Pois ben, o test non distingue que anticorpo está presente no organismo, só que hai anticorpos. Tato Vázquez Lima, membro deste comité e xefe do servizo de urxencias do Hospital do Salnés, lembra que esta carencia obrigaría a facer PCR en todo caso, para confirmar se o usuario ten realmente o virus ou simplemente superouno e é inmune. Si valerían, por exemplo, para facer estudos epidemiolóxicos para coñecer a porcentaxe de poboación que estivo en contacto co coronavirus.
Existen test rápidos de dobre banda, e de feito probáronse en Galicia. Estes si serían de gran utilidade, porque especifican que anticorpo é positivo ou negativo. Por exemplo, un paciente con IGM positivo e IGG negativo está ao principio da enfermidade. Xa apareceron os primeiros anticorpos para frear o virus, pero non os segundos. Se ambos son positivos, está nunha fase máis avanzada da enfermidade, e se o IGM é negativo e o IGG é positivo o paciente está curado e é inmune. Sobre que vai facer a Xunta cos test, os membros do comité non se pronuncian, pero sen dúbida non ven aplicación práctica en sanitarios e centros residenciais. No caso dos sanitarios, se o test é negativo habería que facer unha PCR de confirmación, pero se é positivo tamén, porque pode ser que xa estea curado.
Acordado con autonomías
A Delegación do Goberno en Galicia aclarou que se probaron 70 modelos de test e elixiuse este de forma consensuada coas autonomías, xa que ten unha sensibilidade do 80 % a partir do sétimo día de infección.
