O xeriátrico de Foz cubriu as baixas de persoal e agarda o resultado de máis tests de coronavirus
SOCIEDADE
A Xunta nega que interviñese o centro, onde onte se fixeron probas a residentes
02 abr 2020 . Actualizado ás 05:00 h.Ao peche desta edición descoñecíanse os resultados dos tests de coronavirus que foron realizados o martes a traballadores e onte a usuarios da residencia de maiores de Foz. Estes súmanse aos practicados hai días e que permitiron coñecer que tres residentes (polo menos un tivo que ser hospitalizado) e nove traballadores estaban contaxiados.
Desde a Consellería de Política Social aseguraron onte que a residencia non foi intervida pola Xunta: «Faise un seguimento e supervisión diaria deste centro e de todos, sexan públicos ou privados. Todas as residencias están en continuo contacto cos responsables de cada área sanitaria para coñecer as necesidades asistenciais de cada unha delas». Aseguraron que a Xunta «está a dar prioridade aos tests diagnóstico nas residencias de maiores» e indicaron que se realizan uns 800 diarios. Desde a dirección da residencia pública focense, que xestiona a empresa Idea, aseguraron que tiveron a precaución de ter unha lista para facer substitucións de persoal e, de momento, cubriron as baixas: «Esperamos non ter máis necesidades. Ningunha das persoas que chamamos nos dixo que non».
Desde o Concello seguían á espera de coñecer novidades sobre as probas e pendentes do centro. Nas últimas horas achegáronlles batas, xeles, epis e outros materiais doados pola Xunta: «Polo que sabemos, os internos están ben», explicou o rexedor, Francisco Cajoto.