As precipitacións serán persistentes este luns na costa, aínda que os ventos do suroeste suavizarán as frías temperaturas dos últimos días
27 ene 2020 . Actualizado ás 05:00 h.Despois duns días de ceos despexados con temperaturas frías e xeadas en distintos puntos da comunidade, Galicia pasará a unha situación meteorolóxica dominada esta semana polas baixas presións, con choivas, intensas nalgúns casos, ventos do suroeste e temperaturas máis suaves. O cambio de tendencia iniciouse timidamente onte, pero será hoxe cando se manifeste en toda a súa intensidade.
O que ocorrerá este luns será un anticipo do que se agarda para o resto da semana, na que os modelos mostran un panorama marcado polas choivas de distinta intensidade polo menos ata o xoves. Esta xornada as precipitacións serán persistentes de intensidade moderada a forte, especialmente no oeste de Galicia, co epicentro na provincia de Pontevedra, sobre todo a partir da segunda metade do día, que é cando se agardan os maiores chuvieiros.
A tónica manterase o martes, aínda que probablemente cunha intensidade menor. Así que non quedará outra que volver coller o paraugas.
A cambio, o frío da semana anterior perderá a súa forza e as temperaturas suavizaranse cos ventos procedentes do suroeste. Tanto as mínimas como as máximas experimentarán unha subida e non se agardan xeadas. Iso si, aínda que non se agardan alertas por vento, os refachos serán fortes, especialmente no litoral da comunidade e nas zonas altas.
Alertas no mar
A benignidad das temperaturas, con todo, terá o seu contrapunto coa situación que se agarda no mar. Para este luns anúnciase un aviso amarelo, con ventos do suroeste de forza sete, sobre todo no noroeste da Coruña. A situación aínda será o martes, no que a alerta pasa ao nivel laranxa. Neste caso haberá mar de fondo no norte, con ondas de catro a cinco metros, situación que se agravará na Costa da Morte e no noroeste da Coruña, onde se agardan ondas de seis metros.
A quen as condicións meteorolóxicas deron un respiro foi á zona do Mediterráneo, azoutada nos últimos días pola borrasca Gloria. De feito, a Axencia Estatal de Meteoroloxía (Aemet) desactivou onte todos os avisos. Na súa predición para o conxunto da península prevé intervalos nubrados e un ascenso das temperaturas en gran parte do país.
En concreto, o ceo estará nubrado de madrugada no nordés peninsular, interior do terzo oriental, Baleares, área do Estreito e Melilla, con posibilidade dalgunhas precipitacións débiles, máis probables no Pirineo e serras do nordés de Andalucía.
