Unha ambulancia cumprirá os desexos de enfermos terminais de toda Galicia
SOCIEDADE
Comezará a funcionar en breve e o colectivo lucense Somos Unidos polo Cancro anima a enviar xa peticións
09 dic 2019 . Actualizado ás 21:20 h.Faltan poucos días para que empezo a rodar polas estradas de Galicia a ambulancia do proxecto Somos o teu desexo, impulsada pola asociación Somos Unidos polo Cancro, e que tratará de converter en realidade os soños de enfermos en fase terminal, en fase paliativa ou ben con enfermidades raras como a ELA (esclerose lateral amiotrófica). «Desde Lugo intentaremos cubrir toda Galicia, o occidente de Asturias ata Jarrio, e un pouquiño a comarca do Bierzo, porque son as zonas limítrofes coa comunidade galega», expón José Manuel Vázquez, presidente dun colectivo que naceu na cidade amurallada hai pouco máis de cinco anos impulsado por un grupo de pais e de mozos afectados polo cancro, e que ata o momento traballa con enfermos oncolóxicos e familiares de toda a provincia lucense, desde A Mariña ata a zona sur.
«Non imos traballar a nivel de hospital. Só con xente que estea nas súas casas», comenta Marian Pérez, directiva de Somos Unidos. Os pacientes realizarán as viaxes para cumprir as súas últimas vontades con todas as condicións sanitarias que precisen, acompañados por voluntarios que son técnicos en urxencias, médicos ou enfermeiros, entre outros. «Creemos que se lle pode sacar moito mollo; sobre todo con pacientes da montaña que nunca visen o mar. Tamén se nos ocorren seareiros do fútbol que queiran ver un partido, unha persoa que queira, por exemplo, conseguir ver a un irmán que ten en Barcelona... e que precise bombona de osíxeno», explican desde Somos.
En España hai unha en Murcia
A iniciativa xurdiu dunha reunión mantida entre a directiva e o comité científico da asociación sen ánimo de lucro. «Falando dalgún proxecto que poderiamos facer de forma moi directa con pacientes en fase terminal ou paliativa, descubrimos que xa hai uns compañeiros en España, en Murcia, que o fan. A Fundación Ambulancia do Desexo», expoñen. Inicialmente pensaron en unirse a esta fundación murciana, pero trabas burocráticas animaron ao colectivo galego a crear un proxecto propio no que colaborarán, iso si, «ao cento por cento», coa que preside José Manuel Salgas, quen hai pouco participou no congreso organizado en Lugo por Somos Unidos polo Cancro.
O proxecto orixinal naceu en Holanda no 2007, cando un condutor de ambulancias chamado Kees Veldboer trasladou a un mariñeiro, enfermo terminal. De camiño ao hospital, o chofer desviouse cara ao porto e quedou profundamente conmovido pola inmensa felicidade que experimentou o home. Tomou prestada unha ambulancia da súa empresa e organizoulle unha ruta polo porto de Róterdam, e sorprendeuse do doado que lle resultou facer que o paciente rematase a súa vida dunha forma tan especial grazas a unhas simples chamadas telefónicas», destaca a fundación, que hoxe en día ten uns 270 voluntarios e seis ambulancias en toda Europa, onde cumpre unhas 2.000 peticións anuais. Agora chega a Galicia, e desde Unidos polo Cancro piden voluntarios e animan a enviar xa peticións a info\
Unha iniciativa que se inspira en Miriam Vázquez, que combateu o cancro cun sorriso ata o final
A ambulancia de Somos o teu Desexo lucirá o lema «Sentir que se pode, que che deixen poder». «É unha frase que Miriam se aplicaba e que nos dedicou á súa nai [Marian] e a min por deixala cumprir os seus soños, por non tela encerrada a pesar da enfermidade. Sabemos que a ela lle gustaría que seguísemos loitando polo cancro», explica emocionado, aínda que con gran serenidade, José Manuel Vázquez, presidente de Somos Unidos polo Cancro. A súa filla, Miriam Vázquez Pérez, faleceu hai pouco máis dun ano con apenas 25 tras máis dunha década combatendo o cancro. Cun sorriso ata o final, como aínda recolle o blogue no que relatou a súa loita (http://quedamuchavida.blogspot.com/), e que recibiu case 600.000 visitas.
Fan da Panorama
Ela é a inspiradora deste proxecto que aspira a facer reais os soños de enfermos en fase terminal ou moi graves. Miriam sentía paixón pola vida, e un exemplo reflícteo. A finais do 2012, tras ter vencido xa tres veces ao cancro, con catro costelas, medio pulmón e un peroné menos, non se perdía as citas da Panorama, a orquestra dos seus amores.
