Os restos do furacán formaron unha borrasca que afectará hoxe á comunidade con choivas intensas e ventos fortes
23 sep 2019 . Actualizado ás 21:22 h.O primeiro episodio de choivas e ventos intensos do outono chega só unhas horas despois de que comece a estación. A Axencia Estatal de Meteoroloxía mantén aínda un aviso amarelo no oeste da provincia da Coruña e en Pontevedra para esta tarde por acumulacións de corenta litros por metro cadrado en doce horas e quince en só unha. Ademais, o vento soprará con forza na costa, especialmente no litoral norte, onde os refachos poderían superar facilmente os oitenta quilómetros por hora.
A orixe do primeiro temporal son os restos do furacán Humberto. Tal e como viñan anunciado desde hai días os modelos meteorolóxicos, o ciclón tropical converteuse en borrasca e situouse ao oeste de Irlanda. A fronte asociada ao sistema de baixas presións recibiu ademais unha achega adicional de humidade tropical tras interactuar cun río atmosférico que cruza o Atlántico, conectando agora mesmo o Caribe con Galicia. Os avisos por parte da Aemet por choivas e ventos intensos finalizan este martes pola mañá.
Despois do paso da borrasca, a primeira semana da estación otoñal preséntase húmida. As altas presións dos Azores perden forza temporalmente e desprázanse cara ao sur. Isto permitirá que sopren ventos de compoñente oeste, que se traduce en nubes baixas e choivas débiles, especialmente nas provincias de Pontevedra e A Coruña. Esta configuración atmosférica sempre xera un importante contraste entre o leste e o oeste da comunidade. En Lugo e Ourense o sol irá gañando algo máis de protagonismo de forma progresiva. En canto ás temperaturas, manteranse con valores propios da época do ano. As máximas estarán por amais dos vinte graos. As mínimas descenderán lixeiramente no interior da comunidade, con rexistros próximos aos dez graos.
A Aemet presentou tamén a previsión para as próximas tres semanas. No apartado das precipitacións non se aprecia unha anomalía significativa, nin positiva nin negativa. En todo caso a tendencia apuntaría unha cantidade de choiva lixeiramente inferior á media. Sobre as temperaturas, os modelos si observan uns rexistros por amais dos valores climatolóxicos.
Nas próximas semanas haberá que estar pendente do Atlántico, que nestes momentos mantén unha actividade ciclónica moi activa. Xa se formaron tres tormentas tropicais. Unha delas, que foi bautizado como Thirteen, está localizada fronte a Cabo Verde. Segundo apunta algunhas previsións, comezará a moverse polo Atlántico tropical pero a metade do océano comezará a ascender cara ao norte. A fin de semana ascenderá cara ao norte e podería ser absorbida, do mesmo xeito que sucedeu con Humberto, polos ventos do oeste. Neste contexto aumentaría a posibilidade de que Galicia sentise os seus efectos aínda que a boa noticia é que o anticiclón dos Azores exercería de escudo.