Hai avisos a partir das doce do mediodía por intensos ballóns e aparello eléctrico
23 jul 2019 . Actualizado ás 12:57 h.A estabilidade atmosférica xa é historia en Galicia. As altas temperaturas aínda aguantarán algunhas horas máis. A influencia do anticiclón, que xerou o tempo seco e cálido durante as últimas 48 horas, con máximas que acadaron os 40 graos, comeza a debilitarse. O sistema de altas presións recupera a dinámica que mantivo durante todo o verán, incapaz de estarse quedo nin tan só dous días nunha mesma posición. Como se retira cara ao oeste da Península, deixa espazo para unha zona de aire frío situado no Atlántico norte. O aire cálido acumulado en superficie vaise atopar co xélido en altura e formará sistemas tormentosos.
A inestabilidade volverá ser máis intensa no interior da comunidade. A Axencia Estatal de Meteoroloxía activou avisos amarelos nas provincias de Lugo e de Ourense entre as once da mañá e as seis da tarde. Agárdanse ballóns localmente fortes acompañados de saraiba e aparello eléctrico.
O mércores será unha xornada de transición. Un día sen choivas e ceo despexado, pero o vento soprará frouxo e variable, unhas condicións favorables para que se formen néboas e nubes baixas no litoral oeste.
O xoves o anticiclón dos Azores afástase un pouco máis, deixando espazo a unha borrasca que se vai situar cunha presión duns 990 milibares ao oeste de Irlanda. Desde aí, a fronte asociada cruzará a comunidade galega desde primeiras horas da mañá, deixando choivas que serán máis persistentes nas provincias atlánticas. O termómetro descende tamén de forma xeneralizada.
O venres, o tempo anticiclónico comezará a gañar terreo de forma tímida. As nubes aínda serán protagonistas, sobre todo nas provincias atlánticas aínda que irán desaparecendo co avance das horas.
Debido a un novo movemento das altas presións, Galicia estará a próxima fin de semana nunha situación intermedia. O vento soprará de compoñente oeste, xerando humidade, en forma de nubes. As temperaturas manteranse con valores suaves, sen calor.
De momento, os modelos meteorolóxicos non ven a longo prazo que o anticiclón se vaia a asentar nos mapas. E mentres isto non ocorra, a meteoroloxía seguirá sendo moi cambiante e, en moitos momentos, con influencias atlánticas.