Falece un neno de 13 anos nun accidente mentres o seu pai facía un directo en Facebook
SOCIEDADE
O seu irmán de 9 anos está en estado grave, a vida do pai non corre perigo. Ocorreu en Sicilia
17 jul 2019 . Actualizado ás 18:47 h.O pequeno pobo siciliano de Partinico, na provincia de Palermo, está conmocionado. Este luns celebrouse o funeral pola morte do seu veciño de 13 anos, Francisco Provenzano. Unha traxedia que vai máis aló do accidente de tráfico.
Fabio Provenzano, de 34 anos, ía no seu coche xunto aos seus dous fillos cando impactou contra unha varanda. O neno maior faleceu e o pequeno, Antonino de 9 anos, atópase en coma e sufriu danos irreversibles. O pai sofre traumatismo cranial, hemorraxia cerebral, traumatismo torácico e lesións na columna vertebral, aínda que a súa vida non corre perigo, segundo informa a Repubblica.
A Policía investiga un vídeo que Fabio publicou uns minutos antes do accidente. As imaxes xa foron retiradas de Facebook, pero nelas víase ao home conducindo e mirando a cámara. Despois, escóitase o motor do vehículo e a emisión interrómpese de golpe.
O home está a ser investigado por un posible delito por homicidio por condución irresponsable, mentres se está á espera do resultado das probas toxicolóxicas levadas a cabo.