Asegura que «estes medicamentos non demostraron cientificamente unha eficacia suficiente para xustificar un reembolso»
28 jun 2019 . Actualizado ás 15:06 h.A Alta Autoridade francesa da Sanidade (HAS, polas súas siglas en francés) desaconsella nun informe publicado este venres que a Seguridade Social reembolse o custo dos medicamentos homeopáticos aos seus usuarios, como vén facendo ata agora. O estudo, encargado a este organismo público independente o pasado agosto polo Goberno, fai constar que é «desfavorable ao mantemento do reembolso da homeopatía, tras unha avaliación científica de nove meses», segundo axénciaa Efe.
Agora corresponderá ao Ministerio de Sanidade decidir se suprime a homeopatía da lista de medicamentos custeados polo sistema público, nun país onde estes produtos gozan de gran predicamento e onde se atopas algúns dos principais laboratorios de Europa.
A comisión de transparencia da HAS estudou os efectos da homeopatía sobre 24 afeccións, como a inquedanza, verrugas plantares, oncoloxía ou infeccións respiratorias, e xulga que «estes medicamentos non demostraron cientificamente unha eficacia suficiente para xustificar un reembolso».
Entre as razóns mencionadas para o seu ditame figuran a «ausencia de probas da eficacia» ou a «ausencia dun estudo sólido que permita avaliar o seu impacto sobre a calidade de vida do paciente».
A catalogada como primeira avaliación científica realizada en Francia sobre a homeopatía investigou 1.200 medicamentos homeopáticos, analizou 1.000 publicacións científicas e estudou os documentos presentados polos tres laboratorios cuxos produtos son reembolsados (Boiron, Weleda e Rocal-Lehning).
Tras os nove meses de traballos, a comisión de transparencia emitiu o seu xuízo desfavorable, adoptado por maioría o pasado mércores, tras ter recibido as alegacións dos tres laboratorios mencionados.
Ao mesmo tempo, a HAS lembra que o recurso á homeopatía non debe atrasar a prescrición dos coidados necesarios aos pacientes, especialmente aqueles con enfermidades graves e evolutivas.
E pide acabar coa cultura do «medicamento para todo», tanto entre os médicos como dos pacientes, priorizando o recurso a enfoques preventivos e terapéuticos como a actividade física, cunha eficacia demostrada sobre a saúde.
O ano pasado, o custo para as arcas públicas do reembolso da homeopatía acadou os 126,8 millóns de euros, sobre un total de máis de 20.000 millóns para o conxunto dos medicamentos.
