O patrimonio mineiro e xeolóxico de Galicia, un tesouro turístico a potenciar
SOCIEDADE
Unha xornada organizada polo colectivo Minaría Sostible reflexa o alto valor da xeoloxía galega como fonte de turismo
27 jun 2019 . Actualizado ás 05:00 h.Un titular do xornalista de La Voz de Galicia Francisco Albo acendeu a lámpada no 2001. Nel, expertos internacionais recomendaban que O Courel fose un parque xeolóxico. No 2009 esta idea xa se vía factible e no 2016 delimitouse o geoparque mundial da Unesco, Montañas do Courel, o primeiro de Galicia. É un dos múltiples exemplos da riqueza turística do patrimonio xeolóxico e mineiro da comunidade.
Minaría Sostible de Galicia organizou en Santiago unha xornada sobre esta temática, Turismo e patrimonio mineiro, na que profesionais de distintos ámbitos abordaron a oportunidade de pór en valor o patrimonio e a historia da minería e a xeoloxía. Ángel García Cortés, do Instituto Xeolóxico e Mineiro de España e un dos autores do libro Patrimonio mineiro de Galicia, que se presentou nesta reunión, lembra que as explotacións en desuso e a riqueza xeolóxica constitúen un atractivo para o turismo, se se organizan ao redor dun bo fío argumental. As minas de sal de Wieliczka, en Polonia, apunta García, «reciben dous millóns e medio de turistas anuais, unha cifra que está ao nivel do Parque Nacional do Teide, o máis visitado de España».
E é que Galicia, ademais, é unha das comunidades con máis riqueza mineira, só superada por Andalucía ou Estremadura, «sería a terceira ou cuarta comunidade, e ademais ten unha minería moi variada: desde o wolframio, estaño ou litio ao ouro, pasando polo ferro ou recursos enerxéticos como o lignito», incide Ángel García.
Na xornada déronse a coñecer numerosas iniciativas que vinculan xeoloxía, minería e turismo. Os geoparques son unha delas. Ademais do do Courel, hai dous que se preparan para esta candidatura da Unesco, Ortegal e a Costa da Morte. Juan Ramón Vidal Romaní, catedrático e director do Instituto de Xeoloxía Isidro Parga Pondal, explicou as características deste último, «talvez o máis vistoso pola súa fachada marítima formada case exclusivamente por granitos». E é que as da Costa da Morte, «son as primeiras rocas galegas». Cuevas graníticas, rías, praias de cantos, «de coídos», constitúen o que sería este geoparque galego.
As minas tamén son un recurso turístico. Mayte Sobradelo, técnica no concello de Lousame, explicou o éxito do Museo Minas de San Finx, unha explotación que deixou de funcionar definitivamente no ano 1989 e que puxo a Lousame no mapa. Porque estes recursos non só mostran riqueza xeolóxica ou de ciencias naturais en xeral, senón que reflicten parte da historia e os modos de produción de outrora. «Poderiamos falar da importancia que tiveron estas minas na Segunda Guerra Mundial, dos precursores dos movementos sindicais ou de cando cargaron camións de dinamita para tratar de frear o golpe de estado de Franco», expuxo Sobradelo.
A riqueza xeolóxica e mineira de Galicia está tamén nos balnearios, xa que as augas mineromedicinales van adquirindo esas propiedades na súa travesía polo subsolo. Por iso é polo que o termalismo fose outro dos sectores presentes na xornada, iniciativa da Cámara Mineira de Galicia e o Instituto Xeolóxico e Mineiro de España.