Descobren en perfecto estado unha cabeza de lobo xigante de hai 40.000 anos
SOCIEDADE
O animal, que ten o dobre de tamaño que a especie actual, foi achado no xeo perpetuo de Siberia
14 jun 2019 . Actualizado ás 17:53 h.Mamuts lanudos, vermes prehistóricos, cachorros de león cavernícolas... E ata un poldro de hai 42.000 anos con sangue líquido nas súas veas. Son os tesouros que se conservan no permafrost, o xeo perpetuo das rexións glaciares que vai descubrindo os seus segredos a medida que avanza o quecemento global. E cada achado é unha sorpresa, unha porta que se abre ao descoñecido. A última acaba de chegar co achado da cabeza xigante dun lobo que permanecía conxelada en Siberia e que se atopou en perfecto estado. Correspóndese a unha especie descoñecida que viviu hai 40.000 anos.
Os restos do animal foron achados o pasado ano por un home que paseaba preto do río Tirekhtyakh, na República de Sajá-Yakutia,, un territorio siberiano que limita ao norte co océano Ártico. A cabeza do animal mide 40 centímetros de longo, o dobre da media dunha cabeza dun lobo actual.
O pelo, a pel, os cabeiros e o cerebro do exemplar mantíñanse practicamente intactos, segundo o equipo de científicos xaponeses que analizou a peza, en colaboración coa Academia de Ciencias da República de Sajá. O seu estudo preliminar será completado coa análise de ADN que será realizado no Museo de Historia Nacional de Suecia, en Estocolmo. Deste xeito, o seu material xenético poderase comparar co dos lobos modernos, o que ofrecerá valiosa información sobre a evolución da especie ao longo da historia.
O que revelaron os primeiros datos é que se trata dun lobo adulto que morreu cando tiña entre dous e catro anos. O que aínda é unha incógnita é por que só apareceu a cabeza e como foi separada do resto do corpo.
Albert Protopopov, da Academia de Ciencias da República de Sajá, desvelou a National Geographic que se trata dun descubrimento único, xa que aínda que o achado de restos de lobos conxelados no permafrost é relativamente común, esta é a primeira vez que se atopan os restos dun animal coa cabeza tan grande e con todos os seus tecidos preservados, especialmente o cerebro.«Esta é a primeira vez que se atopa a cabeza dun lobo antigo cuxos tecidos brandos se conservaron despois de 40.000 anos», dixo. Os científicos están agora construíndo un modelo dixital do cerebro e do interior do cranio para un estudo adicional.
O equipo tamén está a investigar un antigo cachorro de león cavernícola, unha especie extinta conservada nas vastas áreas de chan conxelado da rexión siberiana de Yakutia. E, a medida que o planeta se quente, é probable que se sumen novos e descoñecidos achados. «O número de descubrimentos está a crecer debido ao desxeo do chan conxelado», incidiu Protopopov.
Un dos descubrimentos máis destacados ocorreu a principios deste ano, cando se atopou un poldro de 42.000 anos no que aínda se mantiña o sangue líquido e os ouriños. Os científicos mesmo confían en poder clonar o poldro, inusualmente ben conservado. Aínda que non será nada doado.
