Ía por unha estrada secundaria cando foi interceptado pola Garda Civil
12 jun 2019 . Actualizado ás 07:32 h.A Garda Civil detivo a un mozo de 22 anos que conducía un Lamborghini Furacán a 228 quilómetros por hora unha estrada secundaria limitada a 100, preto de Algete (Madrid). Trátase, tal e como indica Efe citando fontes da investigación, do youtuber David Díaz, que publica fundamentalmente vídeos relacionados con videoxogos.
Díaz foi interceptado recentemente de madrugada nun dos controis rutineiros que fai Tráfico en estradas secundarias. Os axentes de Tráfico estaban no quilómetro 18 da M-111, no termo municipal de Algete, cando detectaron un Lamborghini Furacán que circulaba a 228 quilómetros por hora nun tramo limitado a 100.
Déronlle o alto e comprobaron que no coche só ía o condutor. Quedou investigado por un presunto delito contra a seguridade viaria tipificado no artigo 379 do Código Penal polo que podería ser condenado a unha pena de prisión de tres a seis meses ou á de multa de seis a doce meses e traballos en beneficio da comunidade de 31 a 90 días.
En calquera caso privaráselle do dereito a conducir por un tempo de entre un e catro anos, segundo a Garda Civil.
Ese coche era o seu soño
Máis coñecido como Alphasniper97, Daniel Díaz é youtuber español que sobe contidos de videoxogos e que conta con 4,3 millóns de subscritores. Este mozo dedicou varios dos seus vídeos a contar que comprara un Lamborghini, algo que era «o seu soño», explicando cando o adquiriu, cando llo entregaron e mostrándoo aos seus seguidores mentres que o conducía.