A ferramenta experimental permitiría a detección temperá do cancro e o seguimento da súa evolución
10 jul 2019 . Actualizado ás 20:25 h.As células tumorales son moi agoadizas. Tremendamente voraces. Cando penetran nun tecido requiren dun alto consumo de osíxeno e nutrientes. Tanto que necesitan abrir novos vasos sanguíneos para garantir a subministración e poder sobrevivir. E xusto cando empeza este proceso é cando se podería advertir que o organismo está afectado por un tumor. Ou mesmo antes, cando a célula maligna queda sen osíxeno, un proceso denominado hipoxia. Cando isto ocorre o organismo emite unha especie de alerta. É emitida por unha proteína, que en condicións normais se degrada, pero que cando empeza a faltar o osíxeno estabilízase e aumenta a súa concentración nos tecidos. Detectala a tempo, xa que logo, podería servir para o diagnóstico temperán do cancro e para avaliar a súa agresividade, un prognóstico que se pode establecer en función da capacidade das células tumorales de abrir novas tubaxes para acometer a súa invasión.
A identificación desta molécula mediante un método de fluorescencia, o que significa que emite luz cando se inicia un tumor, é o que conseguiu un equipo do Ciqus e do Cimus da Universidade de Santiago e do Cica da Universidade da Coruña mediante o desenvolvemento dun biosensor que reproduce o mecanismo que activan as células tumorales cando detectan baixos niveis de osíxeno. A investigación hase publicado na revista Scientific Reports.
«O biosensor está estructurado en tres partes. Unha estaría formada con una parte da proteína; outra por outra molécula que é a que nos permite penetrar no interior das células, e unha terceira que é a que emite luz», explica José Antonio Costoya, investigador do Cimus e coordinador do traballo.
Os investigadores galegos probaron os biosensores en modelos preclínicos da enfermidade. Pero fixérono en laboratorio, porque a súa aplicación en clínica aínda está lonxe. O é porque para poder detectar a luz emitida pola proteína que delata a ausencia de osíxeno no inicio dun proceso tumoral son necesarios dispositivos de imaxe óptica funcional que aínda non se desenvolveron para a súa aplicación clínica, ou polo menos para a detección e seguimento da evolución do cancro.
En calquera caso trátase dun avance de futuro, xa que os novos sensores están dotados da capacidade para activarse e emitir luz, o que facilitará, segundo os investigadores, «non só a detección do tumor, senón tamén estudiar o seu comportamento».