Unha das últimas frases de Chicho Ibáñez Serrador: ««Sempre me neguei a ese título de mestre»
SOCIEDADE
«Un pensa que o que fixo se cadra serviu de chanzo a moitos», afirmaba o director cando lle entregaron o Goya de Honra
07 jun 2019 . Actualizado ás 20:39 h.O cineasta e realizador Narciso 'Chicho' Ibáñez Serrador, falecido este venres en Madrid aos 83 anos de idade, fixo unha das súas últimas aparicións públicas o pasado 14 de xaneiro, cando recolleu o Goya de Honra durante a tradicional festa de nomeados. «Sempre me neguei a ese título de mestre, porque me parecía excesivo», sinalou naquela ocasión.
O director de películas como Quen pode matar a un neno? confesou que a concesión do premio a toda a súa traxectoria era «algo moi emocionante». O cineasta chegou ao Teatro Real en cadeira de rodas, acompañado polos seus fillos Alejandro e Pepa. Na entrega do premio, que se fixo de xeito privado, Ibáñez Serrador recolleu o cabezón de mans do director da Academia de Cine, Mariano Barroso. O creador do mítico concurso Un, dous, tres lembrou entón o seu labor tanto en cine como en televisión. «Un pensa que o que fixo se cadra serviu de chanzo a moitos», afirmaba o director, reivindicado por cineastas posteriores como Juan Antonio Bayona ou Álex de la Iglesia. «É verdade, pero non era consciente diso, porque estaba tan canso...», chanceou.
Ademais, Ibañez Serrador comentou que o seu labor ía máis aló dunha atracción polo cine de terror ou fantástico, porque a súa intención era a de facer cousas «que non existían nesa época». Naquela festa de nomeados, Bayona foi un dos máis efusivos ao recoñecer o labor de Ibáñez Serrador. O cineasta catalán recoñeceu que «alucinó» cando revisou a obra dun autor que «facía televisión cando estaba en cueiros e ao final era puro cine». «É un creador que me traumatizou cando era neno e foime moi ben», ironizou.
