O museo do antigo campo de exterminio nazi pide aos seus visitantes que non se fagan fotos frívolas: «Lembra que aquí foron asasinadas un millón de persoas»
23 mares 2019 . Actualizado ás 09:50 h.Auschwitz viuse obrigado a pórse serio, tanto selfie vai, tanto selfie vén. Tanta cabriola sobre as vías para logo subila a Instagram. O museo do antigo campo de exterminio nazi construído polo Terceiro Reich na Polonia ocupada, enviou esta semana un atento recado aos seus visitantes: abstéñanse de facerse fotos frívolas nun recinto onde se asasinou a un millón de persoas».
«Cada ano visítannos centos de miles de persoas de todo o mundo e, lamentablemente, vemos como unha parte deles aproveitan o seu percorrido polo antigo campo de concentración para facerse fotos en actitude frívola, sen ter en conta que están nun lugar onde tivo lugar unha traxedia humana», explicaron a Efe desde alí. O límite da súa paciencia excedérono as instantáneas que varios visitantes adoitan facerse camiñando sobre as vías da liña férrea que conducía aos deportados aos campos de concentración para, a continuación, publicalas inmediatamente nas súas redes sociais.
«Hai lugares mellores para aprender como andar sobre unha viga que nun lugar que simboliza a deportación de centos de miles de persoas», lamentaron os responsables do museo a través da súa conta en Twitter, onde ademais mostraron varios exemplos do tipo de imaxe á que se referían. «Cando vés a Auschwitz, lembra que estás nun lugar no que foi asasinado un millón de persoas», engadiron.
Non é a primeira vez que os posados en memoriales do Holocausto xeran polémica. Xa no 2017, o artista israelí Shahak Shapira publicou imaxes onde combinaba as fotografías e posados frívolos dos visitantes con imaxes reais das vítimas do Holocausto. «Auschwitz é un lugar ao que vir lembrar un episodio tráxico da historia, a reflexionar e a aprender o que debemos evitar para que algo así se repita, non é un lugar para frivolizar», insisten desde o museo.
Estímase que máis dun millón de persoas, na súa maioría xudeus, morreron en Auschwitz e no campo anexo, Birkenau, debido aos malos tratos, as cámaras de gas Zyjklon B, a fame, o esgotamento e as enfermidades. Hoxe, Auschwitz-Birkenau é patrimonio da Humanidade da Unesco e un museo-memorial de 200 hectáreas visitado cada ano por máis dun millón de persoas.