O Vaticano expulsa do sacerdocio ao excardenal McCarrick, acusado de abusos sexuais
SOCIEDADE
A Congregación para a Doutrina da Fe considérao culpable de abusos a menores e a adultos coa agravante de abusos de poder
16 feb 2019 . Actualizado ás 17:05 h.A Congregación para a Doutrina da Fe expulsou do sacerdocio ao excardenal e arcebispo emérito de Washington Theodore McCarrick, segundo informa Efe, tras ser acusado de abusos sexuais a menores e seminaristas, informou hoxe a oficina de prensa da Santa Sé nun comunicado.
A decisión da Congregación para a Doutrina da Fe chega despois da investigación que ordenou o papa Francisco sobre o caso.
O papa declarou definitiva unha sentenza neste sentido, precisa un comunicado da Santa Sé, segundo informa AFP.
A Congregación para a Doutrina da Fe considera a McCarrick culpable de abusos a menores e a adultos coa agravante de abusos de poder e por iso imponlle a pena da redución ao estado laical, lese no comunicado oficial.
«O Santo Pai recoñeceu a natureza definitiva, de acordo coa lei, desta decisión, que fai que o caso sexa resolto, é dicir, non suxeito a unha nova apelación», engade.
A redución ao estado laical prevé que non se poden administrar os sacramentos, vestirse como un sacerdote e suspéndese calquera tipo de soldo, informa Efe.
McCarrick, de 88 anos e arcebispo de Washington entre 2000 e 2006, foi acusado de abusar sexualmente de menores e de comportamentos indebidos con novos sacerdotes.
O pasado 20 de xullo un home rompeu o seu silencio despois de 40 anos e asegurou ao xornal estadounidense «The New York Times» que o excardenal abusara del cando era menor de idade, unha situación que presuntamente se prolongou durante dúas décadas, informa Efe.