O bebé atópase en perfecto estado de saúde. A nai ten 42
15 feb 2019 . Actualizado ás 20:50 h.No hospital Tatarella de Cerignola, na provincia de Foggia, Italia, naceu este xoves un particular bebé, fillo dun home de, nin máis nin menos, 93 anos. O nonagenario, de nacionalidade italiana, contraeu matrimonio fai catro anos coa nai do pequeno, de orixe marroquí e 42 anos. Desde entón, a parella vive na localidade da rexión de Apulia, Orta Nova, tal e como recollen os medios italianos.
O pequeno chegou ao mundo en perfecto estado de saúde ante a incredulidade do persoal sanitario, incapaz de dar crédito ás palabras da muller cando, xa de parto, revelou que o home de avanzada idade que a acompañaba era o pai do seu fillo. Antigo ferreiro orixinario de Canosa dei Puglia, nacido en 1925, o devandito está como un carballo, intacta, tras toda unha vida, a súa capacidade de procrear.
A diferenza das mulleres, cuxo reloxo biolóxico non perdoa, os homes poden ser potencialmente fértiles toda a súa vida. Producen espermatozoides de forma continua, sen interrupción; estes renóvanse todo o tempo. A súa fertilidade, con todo, adoita ir reducíndose coa idade e canto máis tardía sexa a paternidade, máis aumenta o risco de anomalías xenéticas. Sempre hai unha excepción que confirma a regra.