Os trasnoitadores teñen maior risco de sufrir diabetes e enfermidades cardiovasculares
SOCIEDADE
As persoas que trasnoitan teñen máis risco de sufrir unha enfermidade cardiovascular e diabetes tipo 2 que as persoas que madrugan, segundo concluíu unha revisión de estudos que analizan se deitarse tarde ou levantarse cedo inflúe na saúde, levados a cabo pola Universidade de Northumbria (Reino Unido).
A razón que aducen os investigadores, cuxo traballo se publicou en Advances inNutrition , é que as persoas con preferencia pola noite teñen máis risco de ter mala saúde porque seguen patróns de alimentación máis erráticos e consumen máis alimentos pouco saudables.
En concreto, o estudo indica que as persoas que se van máis tarde á cama tenden a levar dietas pouco saudables, consumen máis alcol, doces, bebidas con cafeína e comida rápida que os madrugadores. Ademais, as súas dietas conteñen menos cereais e verduras e comen menos veces, pero comidas máis grandes, o que inflúe na posibilidade de sufrir unha enfermidade crónica. En cambio, os madrugadores comen máis froitas e vexetais ao día.
«A evidencia científica prové dun coñecemento cada vez maior na relación entre o cronotipo, a dieta e a saúde cardiometabólica. En xeral, estudos transversais suxiren que un cronotipo vespertino está asociado cunha menor inxesta de froitas e verduras e unha maior inxesta de bebidas enerxéticas, alcohólicas, azucaradas e con cafeína, así como unha maior inxesta de enerxía proveniente dos alimentos naturais», explicou o científico participante no estudo, o doutor Leonidas G. Karagounis.
Comer tarde durante o día está relacionado cun risco elevado de diabetes tipo 2 porque o ritmo circadiano inflúe no xeito en que o corpo metaboliza a glicosa.