A Fundación a Caixa colabora con Afaga para mellorar a calidade de vida de quen atenden a enfermos con demencias
29 novs 2018 . Actualizado ás 05:00 h.Coidarse para poder coidar. Esa é a máxima que desde colectivos como a Asociación de Familiares de Enfermos de Alzheimer e outras Demencias de Galicia (Afaga) queren que comprendan as persoas que atenden cada día a persoas afectadas por ese tipo de patoloxías. Para facelo puxeron en marcha o programa Emponderada-MENTE, unha iniciativa coa que colabora a Fundación a Caixa achegando 12.000 euros dentro da súa convocatoria de . Atención ao Envellecemento, a discapacidade e a enfermidadeA idea é evitar que os coidadores contraian o que xa se deu en chamar síndrome do coidador queimado.
Porque por moito que un queira a unha persoa, non pode estar pendente dela as 24 horas do día, durante as sete xornadas da semana. Non é bo para a súa saúde. Tampouco para o enfermo.
Ademais, é bo que os coidadores compartan con outras persoas que están a pasar polo mesmo que eles como se atopan e cales son as súas dúbidas.
O modo de traballo
De aí a fórmula que usa o programa ao combinar as entrevistas de carácter individual con outras en grupo, traballando o modo funcional e o emocional. A dinámica explícaa Gonzalo Soliño, psicólogo de Afaga e coordinador dos grupos terapéuticos para coidadores: «A primeira parte do programa consta de catorce sesións dunha hora e media cada unha nas que se tratará unha temática relacionada co proceso de coidar. A maiores ofrecemos media ducia de clases de seguimento. As primeiras realízanse cunha frecuencia dunha á semana. Logo xa se dilatan máis no tempo ao convocarse cada dous ou tres semanas. O que facemos son grupos formados por entre 10 e 12 coidadores».
Soliño lembra a importancia de coidarse porque, como apunta, «o feito de coidar altera a túa vida, a nivel físico porque durmirás peor, durante menos tempo. O estrés afecta o sistema inmunológico. Iso produce frustración porque non todos os familiares acaban implicándose do mesmo xeito no coidado. Tamén hai alteracións a nivel laboral que, ás veces, levan a algúns coidadores a ter que reducir a xornada coa consecuente diminución de ingresos...».
Todo isto, engade, fai que resulte imprescindible «diminuír todas esas alteracións para previr posibles problemas, tanto psicolóxicos como físicos». Por iso é polo que calquera coidador que se coide desempeñará mellor o seu labor de axuda.