Esta edición está dedicada á preservación e coidado dos montes
22 oct 2018 . Actualizado ás 10:53 h.O comité científico de Voz Natura xa está na estrada para coñecer os 360 proxectos que levarán a cabo os centros educativos e asociacións participantes na 22.ª edición do programa ambiental de La Voz, desenvolvido pola Fundación Santiago Rey Fernández-Latorre.
O obxectivo destas visitas é que o comité resolva e asesore aos centros sobre as dúbidas que lles xurdan durante a realización dos seus proxectos e coñecer in situ o traballo desenvolvido por eles.
As visitas comezaron o 17 de setembro en Lugo e finalizarán en decembro na Coruña. Renovaranse á volta de Nadal, ata maio, polo que cada centro recibirá dúas visitas ao longo do curso.
Temática dos proxectos
Esta edición está dedicada á preservación e coidado dos montes, polo que moitos centros realizarán reforestacións con árbores autóctonas. «Hai uns días cumpriuse un ano dos incendios que arrasaron Galicia e iso os centros ségueno tendo moi en mente», comenta o portavoz do comité científico, Alejandro Díaz Sueiro.
Pero non todos os proxectos están centrados nesta temática. É o caso da Asociación Sustinea, de Ourense, cuxo proxecto Corredor verde de insectos conseguiu reunir a sete novos colexios participantes en Voz Natura, para construír unha autoestrada verde de flores que axude aos insectos a transportar o pole pola cidade. «Este proxecto reúne todas as cualidades que buscamos neste programa: é colaborativo, orixinal e preocúpase por un tema fundamental como é a perda de biodiversidade », indica Díaz Sueiro.
Voz Natura conta este curso co patrocinio da Consellería de Medio Ambiente, Territorio e Vivenda, a Deputación da Coruña, a Fundación Alcoa, El Corte Inglés e a Fundación Ramón Areces e o apoio da Fundación Biodiversidade do Ministerio para a Transición Ecolóxica.