O PP proporá unha lei de «protección» a embarazadas para evitar o aborto
SOCIEDADE
Non precisa se suporá unha reforma da actual lei que regula a interrupción do embarazo ou se tratará dunha norma independente
28 sep 2018 . Actualizado ás 13:39 h.O Partido Popular vai propor unha lei que se centre na «protección» ás embarazadas para darlles «o maior apoio psicolóxico e económico» posible de forma que poidan seguir adiante coa xestación, fágano «sen ningún tipo de presión» e eviten así o aborto.
Nunha entrevista con EFE, o secretario xeral do PP, Teodoro García Egea, falou desta «iniciativa lexislativa» que pensa desenvolver o partido aínda que non quixo precisar se suporá unha reforma da actual lei que regula a interrupción do embarazo ou se tratará dunha norma independente.
García Egea advertiu de que os populares pensan falar «claro» tanto neste asunto como noutros aínda que lles acusen por iso de escorarse á dereita.
«Non creo que falar claro supoña un xiro á dereita ou ao centro, falar claro sempre é san», dixo o número dous do PP, quen tamén defendeu a posición do seu partido noutros asuntos como o traslado dos restos de Franco do Val dos Caídos, unha decisión coa que, na súa opinión, o presidente do Goberno, Pedro Sánchez, está facendo «o ridículo».
A ministra de Xustiza, Dolores Delgado, comprometeuse no Congreso o pasado mércores a «desenvolver ao máximo» a lei do aborto para que se cumpra en todas as comunidades, e fíxoo en resposta a Podemos, que lle pediu revisar a norma para póla a pleno rendemento.
O PP, pola contra, insiste en impulsar unha lei que permita que as mulleres desistan de abortar porque conten con «o maior apoio posible».
Segundo apuntou García Egea a EFE, a posición do PP sobre este asunto sostense en dous alicerces. O primeiro, o de que «o aborto non é un dereito, é un drama».
E o segundo, defender que a muller que queda embarazada «debe dispor dos maiores recursos e o maior apoio psicolóxico e económico». Para que así poida, engadiu, «saír adiante sen ningún tipo de presión, nin económica nin da contorna».
Sen entrar en detalles sobre a iniciativa, o secretario xeral do PP falou tamén dunha «rede de protección para a muller embarazada», para que «ninguén» poida falar «pola súa boca».
Como tampouco «ninguén», recalcou, «pode subir á tribuna do Congreso falando en nome da muller embarazada».
«Ese é o PP de Pablo Casado, o que fala claro destas cuestións», presumiu quen é a man dereita do novo líder do PP.