Kevin Systrom e Mike Krieger, cofundadores da plataforma, abandonan o xigante que os absorbeu por diferenzas con Zuckerberg sobre estratexias de futuro
26 sep 2018 . Actualizado ás 05:00 h.Os dous cofundadores Instagram, Kevin Systrom e Mike Krieger, anunciaron a súa renuncia á empresa para explorar a súa «curiosidade e creatividade». «Estamos listos para o noso seguinte capítulo», sinalou Systrom, ata agora director executivo da compaña, que forma parte de Facebook .
A axencia Bloomberg indica que a causa desta marcha son as diferenzas con Mark Zuckerberg sobre o futuro da plataforma fotográfica. O blogue tecnolóxico TechCrunch sinalou tamén que a independencia de Instagram viuse moi recortada nos últimos tempos e que iso xerara tensións.
Systrom e Krieger crearon a popular aplicación para compartir fotografías no 2010 e desde entón sumaron 1.000 colaboradores en todo o mundo e máis de 1.000 millóns de usuarios. No 2012, Facebook comprou Instagram por uns 1.000 millóns de dólares. O prezo exacto é difícil de establecer porque gran parte se pagou en accións que se derrubaron despois e agora volveron subir. A plataforma hase convertido nunha importante fonte de ingresos para Facebook, que se atopa en crise por diversos escándalos pola súa política de protección de datos e pola propaganda política.
Segundo Bloomberg, Systrom e Krieger sentíanse ao parecer frustrados pola crecente interferencia de Zuckerberg no negocio diario.