No 2019 dirixirá unha misión non tripulada cara á Lúa
15 ago 2018 . Actualizado ás 09:20 h.India enviará unha misión habitada ao espazo no ano 2022. Anunciouno o primeiro ministro Narendra Modi nun discurso á nación: «India enviará ao espazo a un home ou unha muller en 2022 e antes se é posible», declarou Modi nun longo discurso pronunciado en Nova Deli en ocasión do Día da Independencia.
India será o cuarto país, despois de Rusia, Estados Unidos e China , en realizar esa proeza científica e tecnolóxica, afirmou o primeiro ministro conservador.
India aumentou nos últimos dez anos os investimentos no seu programa espacial, iniciado nos anos sesenta.
A Axencia India de Investigación Espacial (ISRO, polas súas siglas en inglés) anunciou o martes que no 2019 enviará unha misión non tripulada cara á Lúa. En 2014 xa colocou unha sonda en órbita ao redor de Marte. E en febreiro do 2017, a ISRO estableceu unha comentada marca ao colocar con éxito 104 satélites en órbita cun só foguete.