Ryanair di que recolocou á metade dos afectados, pero algúns dos que non lograron praza en datas próximas á súa reserva pagaron ata 300 euros para voar con outra compaña. Consulta aquí se o teu voo está afectado
20 jul 2018 . Actualizado ás 13:07 h.A seis días da primeira xornada de folga convocada polo persoal de cabina da compaña de baixo custo Ryanair, para os días 25 e 26 deste mes, os pasaxeiros afectados comezan a buscar alternativas que poñan freo aos trastornos que lles está provocando un paro que ten por obxectivo que a empresa adapte as súas condicións laborais a cada un dos países onde operan e deixen de depender de Irlanda . No caso de que os 30 voos de entrada e saída a Lavacolla e Peinador que onte xa estaban cancelados fosen completos (cada un ten 195 prazas), o número de afectados na comunidade sería duns 5.850, aos que habería que sumar os galegos desprazados ao aeroporto do Porto. No Sá Carneiro, onde a low cost ten un gran peso, onte estaban suspendidas un total de setenta conexións para ambas as xornadas.
Pero non só os que recibiron o aviso da compaña poderían quedar en terra. Aínda que o ministro de Fomento, José Luis Ábalos, avanzou onte que o seu departamento marcará hoxe os servizos mínimos para a folga, fontes de USO (un dos sindicatos convocantes) matizaron que o feito de que a tripulación de cabina dependa do dereito laboral irlandés, non do español, implica que os traballadores en folga teñen liberdade para presentarse, ou non, no seu posto o día do paro, porque o interior dos avións é chan irlandés. Entón pode darse o caso de que un voo programado finalmente non saia. Aínda que o ministro recalcou nunha entrevista radiofónica que é un conflito privado, garantiu que o seu departamento velará polos pasaxeiros.
A organización tamén presentou onte unha denuncia ante a Inspección de Traballo contra Ryanair polo que entende como unha coacción ao preguntar que empregados farían paro. Pola súa banda, como recolle Efe, o director xeral de mercadotecnia da compaña, Kenny Jacobs, apuntou que recolocaron xa á metade dos afectados. Aínda que onte a aeroliña irlandesa chegou a un acordo en Alemaña cos representantes do persoal de cabina, non será doado que o faga en España. O directivo avanzou que non cre que o paro poida desconvocarse, polo que Ryanair decidiu cancelar con tempo suficiente os voos que non operarán durante eses días, para «dar o maior número de oportunidades» aos seus clientes de poder ser recolocados. Pero non é tan doado.
«Hai xente á que xa non poden recolocar en voos próximos ás datas canceladas porque os avións están completos. Isto supón un importante trastorno para os clientes. Temos un caso dunha familia que está en Canarias á que lle suspenderon a viaxe Tenerife-Santiago para o día 26 e tivo que comprar billetes novos para regresar a tempo, porque os recolocaban nunha data afastada. Cada un halles saído por máis de 300 euros», explican desde unha axencia de viaxes de Vigo pertencente á Asociación Galega de Axencias de Viaxes (Agavi). Aínda que os prezos varían cada día, onte un voo con Ryanair entre Tenerife e Santiago adquirido cun mes de antelación, en concreto para o 25 de agosto, custaba 116 euros.
Que facer cando me cancelaron o voo?
Dereito a asistencia e a transporte alternativo
Os pasaxeiros afectados pola folga de Ryanair, avanzou a compaña, recibirán un correo electrónico ou unha mensaxe de texto anunciándolles a cancelación do seu voo. En caso de recibilo, a aeroliña ofrece a alternativa de solicitar o reembolso do billete ou a recolocación noutro durante os sete días anteriores ou posteriores á data reservada. Para moitos a dúbida está en decidir que alternativa elixir e que pasos hai que dar para ser indemnizado.
Pode pedirse unha indemnización? Como reclamar?
Independentemente da alternativa que escollan os afectados (recolocarse noutro avión ou pedir un reembolso), o regulamento europeo CE 261/2004 establece o dereito dunha indemnización de ata 250 euros no caso dos destinos situados a ata 1.500 quilómetros do aeroporto de saída (todos os da Península). Cando esa distancia é de entre 1.500 e 3.500 quilómetros, como no caso dos voos a Tenerife ou Milán-Bérgamo, a compensación ascende aos 400 euros. O transporte de substitución ata o destino ten que ser a alternativa máis rápida, aínda que se trate doutra compaña. Ese novo billete terá que ser abonado pola aeroliña. Os afectados deberán reclamar ante a compaña, ben a través da páxina web ou nos mostradores que ten no aeroporto. É recomendable gardar toda a información relacionada cos voos e interesarse posteriormente polo estado de cada expediente. Aínda que os reembolsos deberán realizarse nun prazo de entre unha semana e quince días, poden chegar a tardar máis.
Pode librarse Ryanair do pagamento de indemnización?
Ryanair só podería non pagar a compensación no caso de ter avisado ao pasaxeiro da cancelación polo menos quince días antes da data de saída; facelo entre 15 e 7 días antes dando a opción de usar outro transporte como alternativa e que este saia non máis de dúas horas antes da hora do voo cancelado e que, ademais, chegue a destino con non máis de catro horas de atraso sobre o horario previsto. Ou cando a advertencia chegue menos dunha semana antes da viaxe e a compaña dea unha opción de saída con menos dunha hora de antelación sobre o horario e toque destino con non máis de dúas horas de atraso.
A que outras cousas teñen dereito os afectados?
A Axencia Estatal de Seguridade Aérea (AESA) apunta que, ademais de ter que ofrecer transporte alternativo ou reembolso, teñen dereito a asistencia. A compaña aérea debe entregarlles tamén un impreso coas condicións de asistencia e compensación. Tamén debe proporcionarlles comida e bebida suficientes baixo o dereito de asistencia, ademais de cumprir co seu dereito a dúas chamadas telefónicas ou acceso a correo electrónico e, se é necesario, a unha ou dúas noites de aloxamento, así como ao transporte entre o aeroporto e o lugar de aloxamento. Esta asistencia debe ser pagada pola compaña aérea, que non pode pedir ao pasaxeiro que a abone e logo reclámea.
Que medidas adoptarán os colectivos de consumidores?
O Instituto Galego de Consumo «ofrece información e asesoramento a través das súas oficinas nas cidades galegas, na web e no teléfono gratuíto 900 23 11 23». Os viaxeiros poden recorrer á rede de 138 oficinas de información ao consumidor que hai nos concellos. A OCU habilitou, ademais, unha web de queixa conxunta para facer máis forza nas súas demandas.
