Instalan unha enorme cheminea para purificar o aire da cidade máis contaminada de China

É unha cheminea de 60 metros de alto que se atopa no centro dun barrio. Pero en lugar de despedir fume, o xigantesco cilindro purifica un pouco o aire que respiran os habitantes de Xian, unha das cidades máis contaminadas de China , o que tamén implica que é unha das urbes co aire máis irrespirable do mundo.

China , o país que máis contamina do planeta, intenta por todos os medios producir aire puro, chegando mesmo a pechar fábricas nos picos de contaminación. Millóns de cidadáns xa non saen sen unha máscara que filtra partículas finas e instalaron nos seus fogares purificadores de aire.

Ceo escuro

En Xian, a antiga capital imperial que tan só ve o ceo azul menos da metade do ano, as autoridades tomaron medidas como instalar un purificador experimental nos arredores para filtrar o aire da rúa.

O dispositivo, alimentado por enerxía solar, aspira o aire viciado do chan e fíltrao cando sobe á cheminea antes de expulsalo xa limpo á atmosfera. A instalación ten capacidade para descontaminar cada día entre 5 e 16 millóns de metros cúbicos, dependendo do tempo e do nivel de polución, segundo Cao Junji, experto ambiental da Academia das Ciencias chinesa.

O aparello, que está aínda en probas, reduce do 10 % ao 19 % a taxa de partículas finas na atmosfera nun radio de dez quilómetros cadrados.

---

---

---