Un informático da UDC crea unha aplicación para axilizar a homologación das reformas de vehículos

O equipamento dos coches vén de serie. Pero pode cambiarse, por gusto ou por necesidade. E moitos o fan. Un tubo de escape distinto, a carrocería, as lamias, a suspensión, as defensas, faldones ou mesmo o motor. Con todo, calquera modificación das pezas dun automóbil constitúe un proxecto de reforma que debe ser homologado por unha empresa de enxeñería especializada neste ámbito, o que require aos seus empregados unha complexa tramitación. É un traballo que pode axilizarse grazas a unha ferramenta desenvolvida polo alumno da Facultade de Informática da Universidade da Coruña Esteban Abanqueiro Agrelo, que creou unha aplicación que centraliza todos os procedementos.

«Aforramos aos empregados tempo na xestión do procesamiento da homologación e na tramitación dos documentos, polo que o cliente tamén acaba beneficiándose, xa que ten que agardar menos tempo pola súa reforma», explica Abanqueiro, cuxo deseño é un dos cinco finalistas do mellor Traballo de Fin de Grao Aplicado da Facultade de Informática da Coruña. A iniciativa está patrocinada por Everis, Grupo Voz, INDRA, ITG e Telecom e conta coa colaboración do CITIC e FUAC.

Esteban Abanqueiro realizou o proxecto no último curso de carreira e agora traballa na empresa Indra. «Á semana seguinte de acabar o grao xa empecei a traballar», explica. A súa aplicación permite ao usuario introducir os datos da homologación que o cliente desexa realizar no vehículo e xera un orzamento de forma automática. Unha vez aceptado o orzamento por parte do cliente, o sistema decide se a homologación necesita ou non a realización dun proxecto e, en caso positivo, xérao o máis axiña posible xunto coa documentación necesaria e as tarifas.

A ferramenta desenvolveuse para a empresa de enxeñería Inaga, unha referencia no sector con base en Vigo. De feito, foi a propia compaña a que expuxo o desafío aos alumnos de informática. E Abanqueiro Agrelo non llo pensou. Xa tiña o seu proxecto de fin de carreira, un traballo que se materializou nunha aplicación práctica, dado que Inega incorporou o sistema á súa rutina de traballo. Pero o desenvolvemento ten un campo máis amplo. «Podería adaptarse, de forma sinxela, para calquera empresa que se dedique á homologación de reformas de vehículos», explica o mozo informático, quen tamén cre que podería aplicarse a firmas doutros sectores industriais. Agora, no tempo que queda do seu emprego en Indra, traballa para perfeccionar a aplicación.

---

---

---