A serie é unha obra de poder hipnótico, mantén un tempo e unha disgregación narrativa insólitas ata o punto de sorprender que este material teña sido aceptado para consumo doméstico
02 abr 2020 . Actualizado ás 09:01 h.Amazon é a plataforma que peor publicita os seus contidos. Así, non pode sorprender que no seu escaparate leve tempo unha firma de autor de luxo, o danés Nicolas Winding Refn. Too Old To Die Young é unha obra de poder hipnótico. Mantén un tempo e unha disgregación narrativa insólitas ata o punto de sorprender que este material teña sido aceptado para consumo doméstico. Nela, converxen dous killers máis éticos que corsarios. Dous tipos que matan a conciencia, por principios morais. Hai nos seus perfís vetas de Ferrara ou de Paul Schrader. Pero o seu agonismo existencial é, ao tempo, personalísimo. E -por amais deles- dous sacerdotisas do sangue e do revenge van emerxendo a medida que suceden os dez capítulos. E conclúen enseñoreadas desta obra dun cineasta que ata agora -en Pusher , Valhalla Rising ou en Drive - comportouse como o dono da marmita da testosterona.
Pero na rúa sen saída de Too Old To Die Young quen dinamitan o piso son elas: unha, branca, anglosaxoa e protestante, capo vengadora de tipos abusadores. A outra, mexicana dona de cartel -máis preto do David Lynch tenebrista que do gusto do espectador medio- emenda a plana en só una das súas orxías da tolemia a todo o cadro de persoal de feromonas masculinas nas cinco tempadas de Narcos .
«Too Old To Die Young»
****
Estados Unidos, 2019
Dirección: Ed Brubaker e Nicolas Winding Refn.
Intérpretes: Miles Teller, Jena Malone e John Hawkes.