A serie, cuxos dous primeiros capítulos xa están dispoñibles en HBO, relata de xeito maxistral o accidente que marcou o principio do fin da Unión Soviética
15 sep 2019 . Actualizado ás 10:50 h.Como o Holocausto, as bombas atómicas de Hiroshima e Nagasaki ou o 11S, o accidente nuclear de Chernóbil é un deses momentos nos que a historia supera calquera tipo de ficción. Estremece. Nos dous capítulos emitidos ata agora desta serie (hoxe estréase o terceiro de cinco en HBO ) ocorreu iso. A angustia do espectador ao ver a fatal mestura de ineptitude, desesperación, maldade e totalitarismo dá fe diso.
Maxistralmente ambientada e fenomenalmente resolta, a serie mostra unha Unión Soviética gris, oxidada e cunha poboación sumisa a uns líderes políticos arrogantes. Estes pensaban que polo simple feito de dicir que non había desastre este desaparecería. Craig Mazin, o director, sérveo todo en cru, sen panxoliñas. De feito, a serie empeza co suicidio de Valeri Alekséyevich, o científico que alertou da catástrofe, propuxo evacuar Prípiat e tívose que enfrontar ao seu propio Goberno cegado de poder. Encárnao con brillantez Jared Harris, quen se acompaña na xesta de Ulana Khomyuk, personaxe de ficción interpretado por Emily Watson.
Rodada nunha central nuclear de Lituania (levantada co mesmo deseño) e coidando o máximo os detalles, Chernobyl está a revelarse como a serie do ano. Tensa, intensa e real. Tamén serve como un recordatorio sobre os sistemas políticos que prometen o paraíso na terra e guindan ao seu pobo ao inferno ao primeiro de vez.
CHERNOBYL
*****
Dirixida por: CraigMazin
Intérpretes: Jared Harris. Stellan Skarsgård, Emily Watson, Paul Ritter, Jessie Buckley