A Real Filharmonía tocará para os máis novos en oito concertos
SANTIAGO CIDADE
Prepara dous programas distintos para xaneiro e febreiro no que haberá desde cancións coñecidas da cinematografía ata un espectáculo musical sobre Beethoven escenificado por dous actores
05 dic 2021 . Actualizado ás 04:50 h.A Real Filharmonía de Galicia prepara unha serie de actuacións moi especiais para comezar o 2022 con bo pé. A orquestra con sede en Santiago tocará para achegar a música clásica aos máis novos en oito concertos didácticos que se celebrarán en xaneiro, dirixidos aos centros educativos de toda a comunidade autónoma.
O 27 e 28 de xaneiro serán os primeiros catro (ás 10 e 12 horas ambos os días). A Filharmonía interpretará Das tebras á luz, un recital dirixido polo mestre Pablo Devigo no que se inclúen pezas moi populares pensando nos alumnos de ESO e bacharelato, que gozarán con melodías tan recoñecibles da cinematografía como Harry Potter ou Star Wars.
Ao mes seguinte, a orquestra ofrecerá os días 15 e 16 de febreiro (tamén ás 10 e 12 horas) o proxecto O grande Beethoven, realizado en colaboración co Serviço Educativo dá Casa dá Música do Porto. Recomendado para 5º e 6º de primaria, haberá dous actores sobre o escenario como parte do espectáculo.
Os centros interesados en participar deben inscribirse na páxina de compostelacultura.gal a partir do día 10.