Os desaloxados do pub Avante non foron identificados para evitar un problema de orde pública
SANTIAGO CIDADE
A Policía Local sorprendeu a un centenar de persoas no local, moitas delas na barra e sen máscara
01 oct 2020 . Actualizado ás 00:56 h.A Policía Local de Santiago está a terse que multiplicar para facer cumprir as medidas aprobadas contra o covid-19. E é que á incesante celebración de festas nocturnas en pisos, aos botellóns e ás persoas que seguen sen levar máscara en lugares públicos, súmanselle os establecementos de hostalería que incumpren as normas. O caso máis soado produciuse a semana pasada, cando a patrulla nocturna municipal sorprendeu a un centenar de persoas no pub Avante do cantón de San Bieito. Ademais de superar amplamente a capacidade máxima permitida, a barra estaba chea de clientes, na primeira planta había máis de 60 persoas e unhas vinte no soto. Ademais, a maioría non levaban posta a máscara.
O dono do local foi identificado e proposto para sanción, pero os policías, que eran só dous, non puideron identificar os clientes, o que foi criticado entre algúns que non comprenden o motivo. A realidade é que a patrulla non tivo outra opción e nestes casos o protocolo establece non tratar de sancionar tamén aos clientes porque, ademais de ser materialmente imposible e de que moitos poderían fuxir sen que se puidese evitar, tamén podería provocarse un problema de orde pública. «Nestes casos sempre hai que actuar con proporcionalidade e sen provocar males maiores», explica un mando policial.