Case cinco horas encerrados nun avión de Vueling agardando a que despegase cara a Santiago
SANTIAGO CIDADE
Os nervios apoderáronse da pasaxe, retido por mor da tormenta no Prat
24 oct 2019 . Actualizado ás 15:09 h.A viaxe alongouse máis do agardado para os pasaxeiros que onte embarcaron no voo VY1681 operado por Vueling entre o aeroporto de Barcelona e o de Santiago. O despegamento estaba previsto ás nove e media da noite, pero a tormenta no Prat fixo que se atrasase ata as dúas e cuarto, preto de cinco horas, que se fixeron interminables para moitos dos afectados.
Unha parella de Pontevedra que viaxaba nese avión conta indignada que só lles serviron auga como cortesía durante todo ese tempo, «a pesar de que había persoas maiores entre a pasaxe ás que lles podía ter dado un bajón de azucre. As azafatas dixéronnos que para comer algo había que pagar», puntualiza Camilo Lorenzo.
O veciño de Pontevedra, que viaxaba acompañado pola súa noiva Cristina Torrado, explica que o voo «estaba case cheo. Sobraban detrás unhas prazas, pero non máis dunha decena. Embarcamos á hora normal e non nos dixeron nada, ata que unha vez dentro nos informaron de que había un atraso polo tráfico aéreo e que había que agardar media hora». Os avisos dunha maior demora fóronse sucedendo, á vez que se ían caldeando os ánimos da pasaxe.
«Ás tres horas, unha señora levantouse e falou cunha das azafatas para pedir explicacións e saber se tiñamos dereito a abandonar o avión, ou a comer algo, pero non tiñan nin idea e a xente empezouse a molestar. Todo o mundo comezou a levantarse dos seus asentos e a pedir que nos deixasen saír para agardar na terminal. Foron momentos de confusión», relata, especialmente cando empezou a saír fume das rejillas do aire acondicionado. «É algo normal, segundo díxonos o persoal de tripulación», engade, aínda que nese momento prohibiron expresamente gravar e sacar fotos dentro do avión, continúa Lorenzo.
El chego a chamar á Policía Nacional do aeroporto do Prat para informar da súa situación, aínda que de pouco lle serviu: «Dixéronme que tiñan constancia da situación e tiñamos que agardar, que non se podía facer doutro xeito». No entanto, houbo tres persoas que se apearon do avión e ás que se lles advertiu previamente que perderían o diñeiro do billete e o dereito a voar.
Sen indemnizacións
Desde Vueling explican o día de onte foi especialmente complicado no aeroporto barcelonés, polas inclemencias meteorolóxicas, algo do que informaron a través das súas redes sociais ao ver as predicións da Axencia Estatal de Meteoroloxía (Aemet). O de Santiago non foi o único voo afectado por regulacións e houbo que espaciar outras aterraxes e despegamentos durante toda a xornada. A compaña aclara que, unha vez embarcado a pasaxe, non se pode baixar do avión por unha cuestión de seguridade. E, ao tratarse dunha demora por condicións adversas do tempo, a pasaxe non ten dereito a unha indemnización.
«Non queriamos unha indemnización», aclara o pontevedrés, quen adoita viaxar a Barcelona e confesa sentirse aliviado porque nesta ocasión non o acompañaba a súa filla. «Foron demasiadas horas sentados no asento, só cun vaso de auga», apostila.
