Bugallo demanda a revisión da reforma de Clara Campoamor e que non se licite de momento

A solución final para a estación intermodal non convence os socialistas. Deixouno claro o seu portavoz municipal en múltiples ocasións. E fíxoo tamén esta mañá o seu candidato á alcaldía, Xosé Sánchez Bugallo, preocupado pola falta de «ambición» do proxecto, pero alarmado especialmente pola solución que o goberno de Noriega expón para o acceso e saída dos autobuses á estación que constrúe a Xunta.

Descartada a conexión subterránea que se expuña inicialmente para canalizar o tráfico de pasaxeiros por estrada desde a rotonda de Galuresa ata a nova terminal de buses, a opción pasa agora por fixar esa conexión a través de Clara Campoamor, cuxa ordenación e investimento corresponde ao Concello, segundo o convenio subscrito polo ADIF, a Xunta e Raxoi.

Esa ordenación non deixa de ser un «disparate» contrario «aos intereses da cidade», segundo o candidato socialista, pois implica a redución dos actuais catro carrís de Clara Campoamor a dúas (un por sentido) e a especialización de dúas para a entrada e saída de autobuses, aos que se daría prioridade con semáforo. Pero serían 847 buses diarios (contando acceso e saída), co que cada 45 segundos cortaríase a circulación para o resto do tráfico. E o seu efecto, especialmente en horas punta, sería, di, a sobrecarga de novo da rotonda de Galuresa, que «agora funciona razoablemente ben»; o «afogamento» do Hórreo, «agora desafogado»; e un notable incremento tamén do tráfico en Amor Ruibal, ao absorber ademais de máis tráfico particular, boa parte dos autobuses con destino á estación.

Bugallo e o seu número dous, a exedila de Urbanismo, Mercedes Rosón, entenden que ese proxecto debe someterse a revisión e demandan a súa paralización ao goberno de Noriega. Pendente de saír a licitación, o candidato socialista afirma que a remodelación do viario non arrincaría antes de que se constitúa a nova corporación. Nesa circunstancia, afirma que CA non debería sacalo a concurso. Pero se o fixese, advirte, paralizaríao o PSOE «no caso de gobernar», aínda que iso supuxese ter que indemnizar á adxudicataria ou ás aspirantes a facerse coa obra: «Mellor asumir esa responsabililidade e un retraso de varios meses» sobre o ano que «xa acumula» que «hipotecar a mobilidade» da contorna da intermodal.

Os socialistas apostan pola regulación do acceso dos autobuses á estación a través dunha rotonda alí onde Compostela Aberta prevé unha praza con tratamento peonil pero pola que terán que pasar non só os autobuses, senón os taxis _a súa presenza aumentará na zona_, o tráfico rodado privado, o peonil e o de bicicletas, relata o seu candidato. A súa proposta suporía manter Clara Campoamor con catro carrís, abrindo a posibilidade de incrementar o seu ancho varios metros, ata seis, para favorecer a circulación de bicicletas e ampliar unha beirarrúa. Esa ampliación faríase sobre o bordo das brañas de Sar, unha opción máis asumible, defende, que que ao final «alguén saia coa idea, como xa ten pasado neste caso», de que a alternativa ao problema de mobilidade que se xeraría na zona pasase por facer un viario nas brañas, apunta. 

O PP tamén cuestionou nos últimos meses a redución dos carrís para a circulación xeral en Clara Campoamor pola incidencia que terá na mobilidade da contorna da intermodal. 

---

---

---