Tres iniciativas culturais reciben os Premios Emprende Gaiás-Sixto Seco
SANTIAGO CIDADE
Trátase de ideas para reinventar produtos tradicionais e en favor da igualdade
20 novs 2018 . Actualizado ás 10:02 h.Boina Galega, Gaita Galega MIDI e a plataforma Minervas Voice son as iniciativas gañadoras da sexta edición dos Premios Emprende Gaiás-Sixto Seco, que distinguen as mellores ideas emprendedoras no sector das industrias culturais e creativas. Os seus impulsores recibiron onte os galardóns no Museo Gaiás durante un acto que contou coa participación do director xeral de , Políticas Culturaisa xerente da Fundación Cidade da Cultura, o director xerente de Afundación e o xerente de Igape Nova.
Este ano presentáronse 17 iniciativas a estes premios impulsados pola Xunta a través da Fundación Cidade da Cultura. O proxecto Boina Galega de Sandra Vilas impúxose na modalidade de proxectos relacionados co deseño, a xestión cultural e a creación artística e plástica. Recibirá 3.000 euros. Pola súa banda, na sección de proxectos en Internet e desenvolvemento de aplicacións informáticas no sector cultural, o xurado decidiu outorgar dúas distincións: unha a Gaita Galega MIDI -iniciativa de Alejo Pacín- e outra a Minervas Voice -proposta de María Ignacia Cevallos-, que se repartirán os outros 3.000 euros. Ademais, os galardoados terán asesoramento de expertos e poderán incorporarse de xeito gratuíto e durante un ano ao coworking do Centro de de Emprendemento a Cidade da Cultura.
A escritora e divulgadora Elsa Punset puxo o broche ao acto invitando a cuestionar conceptos como que a intelixencia é algo innato. Afirmou que o cerebro é emocional e pódese educar. «Podemos adestralo todo. Tamén as nosas aptitudes para a alegría ou a serenidade», afirmou durante a súa intervención.
Un centenar de empresas conviven no Centro de Emprendemento
Os tres proxectos gañadores dos Premios Emprende Gaiás-Sixto Seco teñen a oportunidade de incorporarse durante un ano de xeito gratuíto ao coworking do Centro de Emprendemento (CEM) da Cidade da Cultura, un espazo destinado a potenciar a creación e consolidación de empresas culturais, creativas e tecnolóxicas. Desde a súa posta en marcha no 2013, o CEM desenvolve un programa de tutoría e acompañamento aos emprendedores residentes ofrecéndolle formación e asesoramento. Segundo destacan desde a Cidade da Cultura, trátase do maior centro de emprendimiento cultural e creativo de Galicia, tanto pola súa ocupación como por actividade.
No espazo do Centro de de Emprendemento o Gaiás conviven ao redor dun centenar de empresas e proxectos emprendedores. Aínda que todos pertencen ao sector das industrias culturais e creativas, destacan especialmente a presenza de profesionais da comunicación, da produción e da xestión cultural. O edificio do CEM tamén acolle á Agadic e unha área de empresas TIC.
Unha plataforma web sobre mulleres inspiradoras ao longo da historia
Minervas Voice, outro dos proxectos galardoados, consiste nunha plataforma web que reunirá información, investigación, documentación e producións audiovisuais que promovan a igualdade de xénero e ejemplaridad daquelas mulleres consideradas inspiradoras ao longo da historia. Inclúe experiencias de realidade aumentada. Detrás de Minervas Voice está a produtora audiovisual María Ignacia Cevallos e un equipo multidisciplinar.
Promove unha gaita electrónica cun son fiel ao tradicional
O músico e enxeñeiro informático lucense Alejo Pacín Jul pretende fabricar a primeira gaita electrónica, baseada en software e hardware libre, que ofreza unha simulación, o máis fiel posible, do son da gaita galega. Este proxecto galardoado busca acabar coa falta de produtos que cumpra as esixencias dos usuarios. Pacín aspira a conseguir esta gaita coa colaboración do artesán Luis Latexes e o gaiteiro Pepe Vaamonde.
Unha boina galega do século XXI con materiais de alta calidade
Pór no mercado a primeira «boina galega do século XXI». Esa é a intención da artesá Sandra Vilas no seu proxecto Boina Galega. A proposta vencedora aposta por reinterpretar os modelos tradicionais con materiais de alta calidade e modernizar a produción, xa que na actualidade non hai firmas dedicadas á súa fabricación. Ademais, a artesá quere proxectar a súa boina no mundo con clientes a nivel internacional.