Durante dúas décadas foi o responsable da conservación do patrimonio da Catedral
20 novs 2018 . Actualizado ás 23:59 h.Alejandro Barral Iglesias , cóengo xubilado da Catedral de Santiago, faleceu aos 88 anos de idade. Como cóengo de arte e secretario do consello de fábrica, ademais de director do Museo catedralicio, Alejandro Barral foi o responsable durante dúas décadas das obras de conservación do patrimonio da basílica compostelá. Entre as súas actuacións máis destacadas figuran a recuperación do coro lígneo do Mestre Mateo, a conservación do coro de madeira ou a reparación das cubertas. Tamén se notou a súa man na revitalización do Museo, que organizou con criterios científicos. Tamén foi un firme defensor da redacción dun Plan Director da Catedral que se axustase á realidade do monumento e ás súas necesidades de financiamento para conservar o seu inmenso patrimonio.
Barral Iglesias , que nacera no Grove en xullo de 1930, dimitiu dos seus cargos no 2006, ao cumprir os 75 anos de idade. Os seus coñecementos e o seu amor á arte valéronlle, entre outras distincións, o seu nomeamento como profesor honorario da Universidade Francisco de Vitoria no 2010. Tamén é autor de catro libros, dous delas sobre a Catedral á que lle dedicou os mellores esforzos da súa vida, unha «Guía da arquidiocese de Santiago de Compostela» e outro sobre «Santa María a Real de Conxo».