Constituído o Claustro da USC, que xa ten previstas dúas novas convocatorias

O reitor da USC, Antonio López, proclamou durante a campaña electoral a súa vontade de dar un maior protagonismo ao Claustro na vida universitaria, e os pasos anunciados onte, na sesión na que se constituíu, van por eses camiños. Así, anunciou unha nova convocatoria antes de final de ano para tratar as liñas de programación plurianual e dos orzamentos do 2019 e outra máis, previsiblemente na próxima primavera, para abordar cuestións xerais de xestión ou que requiran do debate deste órgano de goberno.

A Mesa do Claustro, presidida polo reitor, quedou constituída, en representación do profesorado doutor con vinculación permanente, por Luz Gigirey Prieto, Víctor M. Longa Martínez, Francisco Rodríguez Lestegás, María del Carmen Segura Iglesias , Miguel Abel Souto e Matilde Casas Parada. Por parte doutros colectivos docentes foron elixidos Francisco Javier López González e María del Carmen Sánchez Carreira. Polos estudantes foi nomeada Marta Segovia e quedaron dúas vacantes; e polo persoal de administración e servizos (PAS), Lucía Rodríguez Martínez.

O reitor presentou ante o Claustro o seu primeiro informe, no que expuxo as catro reunións do consello de goberno celebradas desde a súa toma de posesión. Neste sentido, destacou que a primeira delas desenvolveuse, por primeira vez, no Campus de Lugo. Antonio López tamén deu conta da convocatoria de quince cátedras de promoción interna e actualmente en proceso de convocatoria, da futura implantación dos graos en Enxeñería Robótica e en Xestión Cultural, ou a aprobación do Código de Boas Prácticas en Investigación.

O reitor da Universidade compostelá tamén informou o Claustro da constitución do Consorcio Interuniversitario Galego, integrado polas tres universidades da Comunidade Autónoma e a Xunta. No devandito órgano, o reitor da USC ostenta a presidencia, mentres que a secretaría recae na Universidade da Coruña (UDC).

---

---

---