A Supercopa custará entre 19 e 35 euros aos abonados do Obra
SANTIAGO CIDADE
O Pazo de Raxoi acolleu a firma do acordo que regula a organización do torneo, no que participarán o anfitrión, o Real Madrid, o Barça e o Baskonia
27 jun 2018 . Actualizado ás 19:43 h.A Supercopa de España, que se disputará en Sar os días 21 e 22 de setembro, empeza a coller voo. O Pazo de Raxoi acolleu a firma do acordo que regula a organización do torneo, no que participarán o Obradoiro, o Madrid, o Barça e o Baskonia. E xa se coñecen os prezos das entradas e os abonos para os tres encontros, con importantes descontos para os afiliados do Obra, que tamén gozarán dun tempo preferente para a adquisición.
Os prezos dos abonos quedan como segue: en fondos, para os abonados do Obra, 19 euros e para os non abonados 35; en tribuna dúas, 25 e 45; en tribuna 1, 29 e 55; e en retráctiles, 35 e 65. O prezo das entradas soltas, para cada xornada, será de 25, 29, 35 e 45 euros, e os menores de idade poderán compralas por nove euros para tribuna 2. A venda para os abonados do Obradoiro arrincará o 3 de xullo. A destinada á afección en xeral comezará o 7 de agosto. E as entradas soltas estarán a disposición do público a partir do 17 de setembro.
Entre o 3 de xullo e o 7 de agosto cada socio do club compostelán poderá retirar un abono na localización que queira, pero só un por carné. E a partir do 7 de agosto, mantéñense os descontos e tamén poderán facerse novas adquisicións.
Tras a firma do acordo tivo lugar o acto de presentación, ao que asistiron o alcalde, Martiño Noriega; José Miguel Calleja, director xeral da ACB; Valentín González, presidente da Deputación; Miguel Temboury, director xeneral territorial da zona noroeste de Endesa; Raúl López, presidente do Monbus Obradoiro; e Noa Morales , concelleira de Deportes.
Raúl López volveu enarborar a bandeira dun club «humilde, serio e traballador». Aproveitou a conxuntura para pedir unha maior implicación das institucións e expresou o seu convencemento de que se verá un gran campionato. Calleja foi un pouco máis aló: «Empezamos a traballar xa para que esta sexa a mellor Supercopa Endesa que se celebrou ata agora».
O rexedor pechou a quenda de intervencións: «Sempre dicimos que esta cidade é un lugar de encontro e creo que este evento tamén o será, un lugar de encontro arredor dunha paixón que é moi forte nesta cidade, a paixón polo baloncesto».